KEEB KWM HMOOB VAJ

1.  Keeb Kwm Hmoob Vaj, Yawg Yeej Koob  thiab Yawg Vam Lauj nyob Meska piav tias: 

 Hmoob Xeem Vaj - Hmoob Vaj - “Hmoob Vaj Ntxoo - Vaj Ncuab Ntxoo”, "Vaj Tshwm Tshav", "Vaj Pos", "Vaj Tshuav Mab -Vaj Suav Mab", "Vaj Txhim Zeb", "Vaj Lig".

# Txoj dab neeg ntus 1 yog: Hnov tej laus tham tseg tias thaum ub hmoob xeem vaj ces yog ib tug xwb sawv daws yeej coj ib yam ua ib yam, tab sis muaj ib tug yawg nyob rau pem suav teb muaj 3 tug niam:

1. Niam loj (Niam Nkauj Hmoob) = yug tau 9 leeg tub

2. Niam nrab (Niam Nkauj Suav) = yug tau 1 leeg tub

3. Niam yau (Niam Nkauj Hmoob) = yug tau 1 leeg tub

Niam loj puv 120 xyoo ces tshav kub kub cov tub thiaj mu txiav tau 9 tug ntxoo lo txos rau thaum coj niam loj mu tshwm tshav, thaum ntawv niam nrab quaj quaj tias niam loj nim muaj 9 leeg tub, kuv muaj 1 tug tub xwb yog hnub twg kuv tuag ce ntshe tshav yuav kub kub kuv. Tu tub hnov tu tub thiaj los hai rau leej niam tia "Kuv niam koj ntshais ab tsis na, hnub twg yog koj puv 120 xyoo kuv tsis mu txiav ntoo lo txos rau koj lawm os, kuv mam ntxias ib lub tshuav(Yis nqeeb) zoo zoo rau koj kom tshav tuaj lo tshav tsis kub, nag lo los nag tsi ntub koj os. Thaum niam nrab puv 120 xyoo ces tus tub thiaj mu muab nqeeb coj lo ntxais tau ib lub tshuav (Lub kaus yis nqeeb) rau niam nrab, Ces niam yaus thiaj hais tias yus yug muaj ib leeg tub xwb thiab yog yu puv 120 xyoo ces ntshe tshav yuav kub yus xyov yus tu tub pua npaj lis niam nrab tus tub rau yus. Tu tub hnov niam hai li ntawv tus tub thiaj hais rau nws niam tias "niam koj txhob ntshais os lwm hnub koj puv 120 xyoo kuv tsis pub coj koj mus tshwm tshav (tsis pub koj rau tshav kub, tsis pub koj rau nag ntub) kuv mam cia koj nyob hauv tsev xwb os, Ces tom qab no tu niam me puv 120 xyoo tus tub thiaj tsis coj mus tshwm tshav lawm.

# Txoj dab neeg ntus 2 yog: Txheej thaum ub tej laus mus kos taws thiab caij nees xwb, kev mus ib lub zos dhau ib lub zos yuav siv sij hawm txog 2-3 hnub thiaj mu txog.

Lub sij hawm tawg teb chaws khiav pem suav los rau sab nplog teb, Los txog ib tog kev ces tu yawg npe hu ua "Yawg Huas" tau tag sim neej tom ib tog kev, thiaj tau ntau lus mus rau tus muam (Muam phauj) kom tuaj koom lub ntees tuaj saib tus nus ua zaum kawg, Vim txoj kev deb thiab tu muam cab ib tug heev nyuj  nrog tuaj ces tus muam tuaj tsis ncav raws sij hawm. Tom qab muab "Yawg Huas" coj los ua dab ua qhua tau ob hnub (twb ua dab ua qhua tiav lawm) es kwv tawm yuav coj mu zais lawm tu muam (Muam Phauj) mam tuaj txog, Tus muam cab tau ib tug nyuj tuaj tuas rau tus dab laug (ua yog yawg Huas) tu muam quaj quaj ces thiaj muab tus yawg ntawv coj mus tsos rau nram tiaj (Nram nras).

 Thaum coj mus tsos rau nram tiaj (nram nras) es tej laus hus tia tshwm ntsav no mas vim tia tsav kub kub heev (Tshwm tshav = Ziab tshav), Vim tshav kub kub thiab txheej thaum ub tsis muaj lub hleb ntim tus neeg ua ntej, txhawm kom tshav txhob kub kub yawg huas ces thiaj mu txiav tau ib cos ntoos coj lo txhos ua ntxoo ntis lub hnub rau yawg huas, tos cob tu nyuj thiab tuas tu nyuj ua tus muam phauj cab tuaj ntawv rau tus yawg tag tsos mam kwv coj mus zais.

Ces tom qab no yawg hua tej xeeb leej xeeb ntxwv no cias li uas qhov kev cais no lo lawm xwb, thaum ib tug twg tau tag sim neej thiaj kwv tawm nras (Tshwm tshav) mam cob nyuj rau tag, mam tuas nyuj rau tag ce mam kwv mus zais. 

Kev txhos ntxoo no tej laus qhia tia yog tu txiv neej ces kom txhos 7 tug, yog poj niam ces kom txho 5 tug, qhov kev cais txhos txhoo no peb thiaj hus tia “Hmoob Vaj Ntxoo” no lawm xwb.

Hmoob vaj hloov lo ua ntau pab raws li keeb kwm: 

Tiag tiag hmoob xeem vaj thaum ub yog hmoob vaj tshwm tshav tag nrhos, vim muaj ib tus yawg pem suav yuav 3 tug niam thiab cov tub tau ua lub ntees rau cov niam sib txawv ces thiaj cais lo ua ntau pab li tham lo ntawv lawm xwb:

- Vaj Tshwm Tshav (tsi muaj txhoos) = Yog hmoob vaj ib txwm tsis tau hloov dab hloov qhuas 

- Vaj Ntxoos (Tshwm tshav muaj ntxoo) = Yog niam loj 9 leeg tub cov xeeb leej xeeb ntxwv, thiab yog yawg huas cov xeeb leej xeeb ntxwv (kev cais txhos txhoo no peb thiaj hus tia “Hmoob Vaj Ntxoo” no lawm xwb).

- Vaj Tshuav Mab / Vaj Suav Mab = Yog niam nrab tus tub cov xeeb leej xeeb ntxwv (Tshuav = Yog lub yis nqeeb, Suav = yog niam nkauj suav, Mab = Mab suav, Tshuav Mab = Yis nqeeb suav)

- Vaj Pos = Yog niam yaus tus tub cov xeeb leej xeeb ntxwv (Pos = yog hlub leej niam heev tsis coj mu tshwm tshav cais nyob hauv tsev)

- Vaj Txhim Zeb = yog cov khiav suav teb lo nplog teb, cov lo tom qab vim suav khawb khawb toj ntxas thiaj muab txhim rau kom zoo li ntxa suav es kom suav txhob khawb xwb, ce lawv tej xeeb leej xeeb ntxwv cia li ua qhov kev cais ntawv lo lawm xwb.

- Vaj Lig = yog thaum sawv daws los rau sab xov tshoj lawm, es neeg yug npuas coob coob thiab peb hmoob faus tus tuag ntiav ntiav, npua mus tshom tu tuag lo noj lawm, ce thiaj xov vaj rau lub ntxa lawm xwb ce thiaj hu tia "Vaj Lig" (Muaj ib txhias qhia uas dab neeg tia yog tsov lo noj/lo coj/mu ua tsov lawm no tab sis peb hmoob thaum ub tsua hai ntawm lub qhov ncauj thiab hnov ntawm pob ntseg xwb tej zaum tsis yog tsov, yog npua xwb) ce lawv tej xeeb leej xeeb ntxwv cia li ua qhov kev cais ntawv lo lawm xwb, ce thiaj muaj "Vaj lig"

Vaj ncuab ? Vaj Ncuab ntxoo?

Lo lus vaj ncuab ntxhoos yog cim tias thaum coj tus neeg tuag mus tshwm tshav es txhos ntoo kom ntxoov uas ntxoo kom tshav txhob kub tus tuag/lub cev neeg tuag. Vim lo lus tia "Ncuab Suav" mas hais txog pab hmoob uas thaum coj tus tuag mus tshwm tshav es ua lub yis nqeeb ntxoov tus tuag/lub cev tuag. Tus ntxoo kuj siv kom tshav txhob kub ib yam lub tshuav = ib yam lub ncuab Suav (lub yis nqeeb) ces thiaj muaj ib lo lus tia "Vaj Ncuab Ntxoo".

 Vim li ca hmoob vaj thiaj ua tu dab roog sib txawv?

Hmoob vaj muaj ib cos ua dab roog 5 txim muaj ib cos ua dab roog 7 txim, tsob hmoob vaj twg ua dab roog 5 txig yog cov tsis tau txais dab, thaum ub lawv tus yawg koob tsis yog tu coj dab coj qhua, lawv tseem ua li qub xwb. Hos tsev hmoob vaj twg yog ua npua dab roog 7 txim ces yog lawv yawg koob thaum ub yog tu coj dab coj qhuas (nws hus nws 2 txwg ntxhai vauv nrog) ces thiaj ua 7 txim lawm xwb.

Vim li ca hmoob vaj ntxoos muaj ib co hos tsis teev xwm kab - Ca Tej tug hos teev dab roog hmoob thoj? 

Raws li hmoob vaj ntxoo txoj dab neeg, cov tsis teev xwm kab no yog yawg kooj neeb cov xeeb leej xeeb ntxwv ua yog niam yaus cov tub, vim niam yaus teev dab qhua hmoob thoj (dab roog hmoob thoj) tu xwm kab teev pem niam loj tsev lawm, ces tom qab no niam yau cov tub tej xeeb leej xeeb ntxwv cia li tsi teev lawm xwb, ces thiaj muaj tej yim teev dab roog hmoob thoj (Tej laus qhia tseg tia teev dab roog hmoob vaj, hmoob thoj lo tau tsis txhaum, nyob ntawm nyiam xwb, xyoo no teev dab roog hmoob vaj, lwm xyoo xav hloov teev dab roog hmoob thoj lo yeej tau tsi txhaum no).

Vim lis cas thiaj hloov pauv ntau ntau lawm?

Vim txoj kev ua li pom tej laus ua xwb, thiab vim tej laus thaum ub tsis nyiam daws vij daws swv tab sis phej nyiam hu muam phauj tuaj tsawm cem foom ib nrab rau tus tuag, cem foom ib nrab rau cov tom qab kom caiv yog tsis caiv ces npam li ub li no thiab tsam lam rov muaj teeb meem li qub duas ces thiaj muaj kev caiv kev cim thiaj ua dab ua qhua sib txawv tag lawm xwb. Tiag tiag ces hmoob vaj yog ib tug thiab thaum ub yog hmoob vaj tshwm tshav tag nrhos xwb.

2.     Keeb Kwm Noob Kooj Neeb, Tu Paiv Yog “Yawg Tooj Dees Vaj” Nyob Meskas     

Hnov tej lau tham tseg tia thaum ub peb poj koob yawm txwv nyob niam dej dag, thaum nyob suav teb cov kwv tij niam txiv ib plab kiag muaj tag nrhos yog 24 yig, tu coj ntawm cov kwv tij yog yawg xyooj thiab pog xyooj (24 yig no yog cov kwv tij ua nco tau txij li ntawm yawg xyooj thiab pog xyooj nkawv tiam xwb, cov kwv tij ua yog tiam ua ntej yawg xyooj thiab pog xyooj lawv rov tov lawm ces cov khiav lo rau sab nplog no tsis muaj tu tuav tau lawm tia muaj pes tsawg yim ua ntej ntawv), Ntawm 24 yig no cov khiav los rau sab xov tshoj teb (Nplog teb) yog muaj 12 yig, cov khiav los tom qab raug “Khuav” muab tuav tseg  (ດ່ານກັດໄວ້) rau tom qab lawm (hnov tej laus hais tseg tia pog xyooj mas yog ib tug neeg txawj ntse heev, yog tham thiab sib hais txog txoj kev cais nrog suav mas pog xyooj yeej sib nrawg nroos nrog neeg suav), peb tsev hmoob vaj no cov txhais ncauj thiaj heev duas thiab ntse duas cov tub.

     Tom qab yawg xyooj thiab pog xyooj nkawv ces yog yawg kooj neeb tiam, Ua yog tiam ua khiav pem suav teb lo rau nplog teb (suav tuam tshoj lo rau xov tshoj), Qhov peb hus tia “Noob Kooj Neeb” ce yog hu raws li qhov ua nco tau txij li tiam ua yawg kooj neeb lo lawm xwb (Hnov tej laus hai tia yawg kooj neeb mas yog ib tug coj thiab txawj ua neeb - ua neeb leej heev).

     Yog tsev hmoob vaj twg hos paub txog tus yawg hu ua yawg xyooj thiab yawg xyooj cov kwv tij ces tsev ntawv yeej yog peb caj ces no ntag. Peb cov lo rau sab nplog no yeej nug tsis tau tia peb tsev neeg no cov nyob suav teb tshuav tsawg yim, nej hnub niam no lawv noj nyob li cas li lawm.

     Tsev hmoob vaj twg hos paub Yawg Xyooj thiab Yawg Kooj Neeb txoj dab neeg no thov pab tham qhia thiab noob kooj neeb (Kooj neeb cov tub kiv) tseem xav paub kom ntau tshaj no.

Kev hloov ntawm hmoob vaj ntxoo (Noob Keej Neeb)

Xyoo 2006 lo no xwb peb tsev kwv tij hmoob vaj ntxoo (Noob Kooj Neeb) no muaj kev hloov pauv thiab sib tawg lo ua 2 peb lawm:

- Pab 1: Cov nyob nplog teb 100% thiab ib cos nyob sab Mekas (60%) tseem ua Thaj Neeb Ntawv thiab Thaj Neeb Sau Sub Noj Peb Caug, ntawm thaj neeb ntawv ua 2 xyoo thaiv, 1 xyoo thib.

- Pab 2: Cov nyob sab Mekas muaj 40% tsis pom zoo ua ob thaj neeb no lawm (Thaj ntawm pov hwm yej thiab thaj ntawm phauj npliag ntsaim) Yawg Vam Lauj yog tus ua neeb mus muab 2 thaj neeb no kaws cias lawm ces lawv tsis ua 2 thaj neeb no lawm. Yawg Vam Lauj hai tseg tia "Yawg twb muab kaws tseg cias lawm (Ua mu 3 txheej 3 tis - 9 tiam poj 9 tiam yawm), yog cov xeeb leej xeeb ntxwv leej twg tsis ua lawm lo cia li tsum tso tseg lawm xwb, ho yog leej twg hos nyiam ua ob thaj neeb no lo cias nws ua nws".

Tom ntej no muaj ib nrab cov ntsias pom teeb meem kev txom nyem ntawm kev ua ob thaj neeb sub no yuav tso tseg tsis ua lawm, yog tu twg tso tseg ces yog yuav cais tawm ntawm cov kwv tij tseem nyiam ua ob thaj neeb sub ces yuav mu ua kwv tij nrog cov tsis ua ob thaj neeb lawm, ces peb yuav muaj hmoob vaj ntxoo ob pab (pab 1 ua ob thaj neeb "Neeb sub thiab neeb ntawv", pab 2 tsis muaj neeb sub thiab neeb ntawv lawm), nyob li ntawm 60% cov ua nyob sab Mekas ua tseem ua thaj neeb no tej zaum hnub twg cov laus ua tsis pom zoo ntawv tag mu lawm ces tej zaum cov hluas lawv yuav tsos 2 thaj neeb no tseg tag vim cov hlua 100% tsis pom zoo ua lawm tab sis cov niam cov txiv tseem ua ces lawv tseem koom ua nrog cov tim nplog no xwb.

 3. Kev Caiv Kev Cim Ntawm Hmoob Vaj

3.1.  Caiv Txiv Qaub

Hmoob vaj (Vaj ntxoo - Noob Kooj Neeb) caiv tsis pub noj txiv qaub ntxuag mov, tsis pub tso tsuam txhuv thiab tsis pub tso nrog mov, nws qhov keeb kwm tiag tsis muaj leej twg khaws tau meej lawm vim sawv daws piav tsis sib thooj, cov lus piav sib txawv li hauv qab no:

"Yawg Vam Lauj" Piav tia: Thaum ub muaj ib tug yawg noj qaub ntxuag mov tau daig caj pas tau tag sim neej lawm, Vim tej lau thaum ub tsis daws vij daws swv tab sis hmoob lau phej nyiam hu muam phauj tuaj tsawm, tuaj kib noob zaub tseb rau tug tuag ntawv muab tu tuag ntiab rau pog npluj pog nplas mu ua dab tus coj tus ces, ces muam phauj thiaj foom lus tsis zoo rau tu tuag thiab thiaj foom ib nrab rau cov tom qab kom caiv xwb.

Ce tej lau thiaj caiv tsi pub noj qaub ntxuag mov, tsi pub tso txiv qaub tshooj mov thiab txhuv noj lo mu txheej dhau txheej lawm xwb.

"Yawg Ntxoov Doog" paiv tia: Thaum ub muaj ib leej txiv mus ua teb mus pws pem teb, muaj ib hnub nws muaj mob nws tsis xis neej, ces nws tau ntau lus rau neeg zej zog kom lo tom tsev lo hais tsev neeg kom tuaj siab nws tom teb, vim nws tsis xis neej thiab mov lo yuav tag lawm kom npaj ib qhos txuv tuaj tau noj. Neeg zej zog tau lo qhia tsev neeg li leej txiv hais, ces tu tub hlob thiaj npaj tau ib qhos txhwv thiab ntim tau ib qhos mov sus tso rau hauv lub kawm ces thiaj coj tu kwv yaus ces ib kwv tij thiaj tau mu pem teb. Cas twb tau ib hnub tom qab muaj neeg mu pem teb pom leej txiv twb tag sim neej lawm, thiaj lo hai qhia tsev neeg tia cas tsis muaj neeg mus pem teb li es leej txiv tag sim neej lawm no, kom mus saib, tsev neeg hai tia tu tub hlob thiab tu tub yaus nkawv ib kwv tij twb mu tom teb lawm es tsis pom nkawv lo cas, neeg teb tia tsis pom nkawv. Ces suav daws thiaj mu tom teb thaum mu txog ib tog kev muaj ib tsob txiv (Txiv nplais qij) nyob nram qab kes, cas ob kwv tij ntawv tseem nyob ntawm tsob txiv, tu tij tseem des txiv tas zog, tu kwv yaus zaum zov lub kawm, hauv lub kawm des tau ib cos txiv muab tso tsuam cov txhuv thiab cov mov sus. Thaum zej zog mu qws ces nkawv mam tsim lo, sawv daws nug tia cas neb hos tsis mu peb teb neb tseem ua ab tsis nov, nkawv tau teb tia tseem des txiv xwb vim tu kwv yau yuav noj txiv, des txiv kiag xwb ces nkawv mu lawm, nkawv nco mas zoo li nkawv nyuam qhuav tuaj des txiv kaig xwb,  tab sis xyov nkawv twb tuaj nyob ntawm tsob txiv thaum twg lo lawm vim nkawv twb tuaj tom tsev tuaj tau 1 hnub 1 hmos lawm, Ces muam phauj thiaj tsawm kom caiv tsis pub noj qaub ntxuag mov, tsis pub tso qaub nrog mov thiab txhuv lo lawm xwb.

"Yawg Tsav Txhiaj" Piav tia: Hnov tej lau hais tseg tia thaum ub muaj ib nkawm niam txiv hmoob vaj (yog tsev hmoob vaj no) tsi paub tab, muaj ib hnub lawv mu tom teb txog caij noj sus tau lo rau mov noj ntawm qab ntoos, thaum tseem tab tom noj sus, ce tu me nyuam ntawm ob niam txiv ntawv tau saib saum ntoo pom cov txiv qaub (Txiv nplais qij) tu me nyuam phej tsis noj mov nws phej taij tia noj txiv-noj txiv. Tiag tiag ce yog tu me nyuam yuav noj cov txiv qaub saum ntoo xwb. Tab si tu txiv ntawv tsis paub ce thiaj xav tia ca tu me nyuam tsis noj mov es phej yuav noj txiv, tsam yog muaj ab tsis nkag tu me nyuam lawm thiaj yuav noj tu ua txiv. Ce tu txiv thiaj muab tu me nyuam ntawv tua lawm. Tom qab muab tu me nyuam ntawv tua pov tseg lawm ce thiaj mam paub tia muaj cov txiv qaub ntawv nyob saum ntoo (Yog tsob txiv nplais qij), tiag tiag yog yuav noj cov txiv qaub xwb, tsis yog yuav noj nw txiv (nov yog thawj thawj qhov chiv keeb huam yuaj), Tom qab txij li thaum nkawm niam txiv no muab tus me nyuam no tua tag lo ces yog leeg twg tso qaub tsuam mov, tso nrog txuv thiab noj ntxuag mov ces phej pom muaj nab los, ntawm tu nab ntawv tej laus ntseeg tia "Yog tu me nyuam tus ntsuj plig" no, ce thiaj caiv lo txheej dhau txheej lawm xwb.

Raws li cov lus piav lo saum toj no ib leeg yeej piav ib yam, tab sis feem coob piav mus ib zeem li qhov "Yawg tsav txhiaj piav" ntau duas, es sawv daws nyeem no lo kuj hos nrog txiav txim seb qhov twg yog qhov tseeb, kuv tsua sau raw li tej lus tham tseg xwb.

3.2.      Caiv Qab Cub, Caiv Nthab Thiab Caiv Txaj

Hmoob vaj (Vaj ntxoo - Noob Kooj Neeb) no mas tus nyab caiv tsi pub mu nram tu yawg lub qab cub thiab tsi pub nce mu sawm yawg lub nthab thiab kuj tsis pub tus nyab nkag mu hauv tu yawg lub txaj (Qhov twg nyab caiv yawg ce yawg caiv nyab ib yam), muaj coob leej tham sib txawv txog ntawm txoj keeb kwm qhov kev caiv li hauv qab no:

"Yawg Vam Lauj" Piav tia: Qhov tseeb tiag ntawm txoj keeb kwm yog txheej lau thaum ub cov lau siv lub nthab coj lo cia khoom thiab cov lau nyiam pws nram qab cub heev (cov lau hau yeeb muaj ib feem lawv pua lev rau nram qab cub ce lawv pws nrav) qhov caiv tsi pub tu nyab mu nram qab cub thiab nces mu saum tu yawg lub nthab thiab tsis pub mus hauv lub txaj mas yog thaum ub muaj ib tug nyab siab tsis ncaj es phej mu muab mu nyiag tu yawg tej khoom (tej nyiaj) ce muaj kev sib cav sib ceg muaj kev sib foom lo lawm es thiaj caiv lawm xwb.

Tab sis txheej tshiab no peb tej vaj tej tsev twb tsi muaj qab cub rau txiv yawg pws thiab twb tsi muaj nthab rau cia khoom, tej nyiaj los tsis tshua tso hauv tsev lawm (Nyiaj nyob tom Bank ntau lawm xwb) Qhov no ce tsi muaj teeb meem ab tsi lawm.

"Yawg Tsav Xwm" nyob noos hais piav tia: "Yawg txiaj pov" nyob Meka tau kaws ib daig kasxev lo rau "Yawg Tsav xwm" thiab nws tau piav txoj keeb kwm tseg tia "Peb tsev hmoob vaj no thaum ub yeej muaj ib txoj kev ntseeg tia thaum yuav tau tu nyab tshiab lo ces tu nyab yuav tau ev tu yawg 3 tag kis ncig ntug cub txhawm rau kom ua neej thiaj huaj vam no (Tej laus tham tseg li ntawv), Ntawm qhov kev caiv kev cim kiag yog tej lau thaum ub nyiam mu yuav tus nyab rau tej tub tseem me me, Vim tu dab laug tau qhiab phauj tu ntxhais cias, phauj tu ntxhai hlob, dab laug tu tub tseem yaus lo yeej mu yuav lo ua nyab, phauj tus ntxhai tiav niam lawm thiaj tau tso xov rau dab laug tia seb pua yuav yog yuav ce kom tuaj coj tus ntxhais loj lawm tsam hos muaj hlua nraug no, Vim dab laug tu tub tseem me me dab laug tau mu coj tus ntxhais ces tu ntxhais tsis kam yuav dab laug tus tub, thiab tus ntxhais tau hais rau niam thiab txiv tia tsis kam yuav vim " ib tu tub tseem me, ob yog yuav lawm yuav tau  ev yawg ncig qab cub 3 tag kis, nws li nws tsis kam ev txiv yawg ncig qab cub" thaum hai li ces tu nus thiaj hai tia lawv twb qhaib tseg lawm thiab lawv tuaj coj lawm ces kom yuav ntawm qhov yuav ev ncig qab cub ntawv kom txhob ntshais kom tu muam muab ib ces khaub ncaws rau tu nus hnav thaum sawv ntxov kom tu muam sawv lo rauv taws, thaum rauv taws tiav ces kom qhib qhov rooj rau tu nus, tu nus mam nkag lo ev tu txiv yawg xwb (Tu nus yog phauj tu tub). Ces phauj tu ntxhais thiaj ua siab yuav dab laug tu tub lis hai, Thaum tu ntxhais sawv lo rauv tau taws  tiav ces thiaj qhib qhov rooj rau tu nus (Nw tu dab laug) nkag los hauv tsev, ces txiv yawg sawv los, tus nus thiaj muab tu txiv yawg ev khiav ncig qhov cub, Tab sis vim tu dab  laug muaj zog heev nws ev txiv yawg ncig qhov cub nws khiav ceev ces ua rau tu txiv yawg poob ntawm qab cub ua rau tu txiv yawg tau tag sim neej lawm, ces muam phauj thiaj tuaj tsawm kom txwv tsis pub ev ncig qab cub ntxiv lawm, thiab thiaj tsawm kom ciav txaj, caiv nthab, thiab caiv qab cub tib sis, ces txheej tom qab no peb tsev hmoob vaj no thiaj caiv qab cub, caiv nthab thiab caiv txiaj lo lawm xwb.

Chiv keeb ntawm kev caiv no tej laus tsis sau tseg tsis paub tia qhov twg thiaj yog qhov tseeb, tsua sau rau li tej lau tham tseg thiab hnov lo xwb.

Qhia Kom Paub:

"Yawg Vam Lauj" piav tias: Txij li xyoo 2006 lo rau tom qab nos cov nyob rau sab Meskas kuj muaj ib nrab tsis caiv lawm, ua ntej ntawv xyoo 2004-2005 ua ntej yawg hlob vaj pov tsi tau tso sawv daws tseg, yawg hlob Vaj Pov tau hai rau sawv daws tia kom peb tsob hmoob vaj no tsis txhob caiv lawm, es thiaj tsis muaj teeb meem rau txoj kev vam meej, Yawg hlob twb yog hmoob tu coj thiab twb yog tu coj ntawm peb tsev hmoob vaj no, Hlob xav kom tsos tseg txoj kev caiv ntawm qhov tsis pub noj mov ua kes, tsi pub nkag mu hauj txaj, tsi pub koom ntxuav ib lub tais ntxuav tes, tsis pub koom ib lub tais ntxuag muag, Tsi pub ntxhua khaub ncaws .... thiab lwm lwm yam ua tsis tsim nyog, kom txhob caiv lawm es muab tso pov tseg kom tas. yog leej twg hos siab tsi ncaj los nyuj ua rau nyuj thauj nees ua nees ris xwb, leej twg siab tsi ncaj tsi ncees kom npam txij leej twg thiab cais txoj cais mam txiav txim lawm xwb. Txhob muab coj lo caiv txhua tsav tshua yam lawm, vim tus yawg twb yog tus yuav zov saib cov me nyuam xeeb ntxwv rau tej tub tej nyab, tej tub thiab tej nyab lo ib yam, yog tu tub thiab tu nyab ua tus yawg nrog nyob twb yuav npaj zaub npaj mov rau yawg noj, yog tus yawg laus lawm thiab yog tus yawg muaj mob muaj nkeeg tus tub tu nyab twb yuav tus-yuav ntxhuas nws tej ris tsho khaub ncaws. Ua ntej yawg hlob tseem nyob muaj ib nrab tsis caiv lawm tab si muaj ib nrab yeej tseem caiv, Tom qab Hlob Vaj Pov tau tso sawv daws tseg tag ces sawv daws xav tia  Hlob Vaj Pov twb yog tus coj hai neej lo yuav hai dab lo yuav, Hlob hai li hlob twb tag mu lawm ces cias sawv daws ua li hlob hai es muab tso tseg,  Ces ntawm qhov caiv no tsua yog qhia kom paub es txhob ua siab phem lawm xwb (tu twg hos ua dhau lawm lo kom npam txij nws xwb) ces sawv daws tsis caiv lawm. 

"Yawg Paj Vws" Piav tia: Kev caiv ntawm yawg thiab nyab no mas kom nkag siab hai tia tsua yog caiv phaj yawg ua yog tu tub ntawv leej txiv thiab nw phaj xwb, phaj ua yog yawg koob ua yog “tu tub lej txiv – txiv lawm” ce tsi caiv lawm (Yawg koob thiab nyab xeeb leej, nyab xeeb ntxwv lawm ce tsi caiv lawm).

3.3 Qhia Daws Vij Daws Swv (Kom Txhob Muaj Kev Caiv Kev Cim Ntau+)

Yawg Vam Lauj tau hai tseg cias tia: Txij hnub no lawm yav tom ntej txhawm rau kom txhob ua kev caiv kev cim thaib txhob muaj kev npam rau tej tub tej kiv tej xeeb leej xeeb ntxwv, peb hmoob yuav tau hloov tus cwj pws hus muam phauj tuaj tsawm (Kib noob zaub tseb rau) es foom tseg kom noob zaub tuaj mas thiaj rov leej – rov muaj duas es muab tu tuag ntawv tu ntsuj plig ntiab rau pog npluj pog nplas lawm (Tej no yog ib txoj kev coj ua yuam kev thiab siab phem lim hiam ntawm cov laus thaum ub xwb), Txheej tshiab no nej tej tub tej kiv nco ntsoov cias, tej lus no tsis tham rau leej twg yuav thiab tsis tham rau leej twg hnov, tab sis peb yuav tau nco ntsoov los daws tej teem meem – tej vij – tej swv uas tau pom tshwm ntawm qhov muag, kom txhob fam, txhob npam rau txheej tom qab lawm.

 Kev daws vij daws swv ntawm tus tuag vim raug luag tuas, poob ntoos tuag, poob tsheb tuag, poob dej tuag, tsov tom tuag, Nab tom tuag, noj tshuaj tuag, tsheb tsoo tuag … muab tham tso pov tseg tsis yog tham rau ib tug twg yuav tab sis yog hnub twg muaj muaj tej teeb meem nos yuav tau ua li nram qab no, txhawm rau kom txhob muaj kev caiv, kev cim, txhob npam thiab txhob fam lawm:

 - Npaj 2 com ntawv

 - Kom tus txiv dab (Tu coj dab coj qhua) lo hlawv rau

Cov lus daws vij daws swv hai li no:

=> “Hnub no koj ntaub noj ntawv hau tag lawm koj thiaj …. (Dai tuag, noj tshuaj tuag, poob dej tuag …) kom koj tus ntsuj tus plig tau kev mus thawj thiab thawj thws- kom koj thiaj tau kev mus hloov ntaub noj ntawv haus no ces … muab 2 com ntawv no rau koj es koj yuav lo daws koj … (lub voj hmab voj hlua, ... tu vij tsov tom, .. tu vij poob dej,…) muab koj tus vij tus swv ….? daws tso rau ntiaj teb es koj thiaj mus tau, koj yuav mus ciaj txwv zeej txwv koob, koj mus ciaj tsi tau nyob tsi tau ua txwv zeej txwv koob los koj thiaj mus muab tau ntaub ciaj nom, ntawv ciaj tswv, ntaub rhiav niam, ntawv nrhaiv txiv,  ntaub thawj thiab, ntawv thawj thws rov lo thawj thiab ua xeeb leej xeeb ntxwv, sawv tseem lo ua nom ua tswv, tus vij …. (dais voj .. swv dais tuag) ces muab hles tuaj rau nruab luaj nruab av tsis pub ua nras zeb nras hlau tsuam koj nruab koj cev, peb yuav ntas koj dab koj qhuas tsis pua fam rau nas qab vag noog qab zeg rau saum yaj nawb…!!!

Thaum tu coj dab lo daws vij daws swv tag li no ces, muab 2 com ntawv hlawv rau xwb, ces muab tus neeg coj lo ua dab ua qhua xwb es thiaj tsis muaj teeb meem lawm yav tom ntej.

Qhia Kom Paub:

- Ntawm ob com ntawv, yog tsis tau coj tu neeg lo hauv tsev es hlawv thiab daws vij daws swv ua ntej nraum zoov tag hlawv ob com ntawv rau tag nrawm zoov lawm mas coj tu neeg lo tsev lo tau, yog coj tus neeg lo tsev lawm ces coj lo hlawv hauv tsev ua hauv tsev lo tau.

-  Yog hos thov muam phauj tuaj tsawm los tsawm rau qhov zoo xwb, kom mus dawb mus huv txhob fam rau nas qab vag noog qab zeg xwb txhob foom kev caiv kev cim rau cov tom qab lawm.

- Yog muaj tej yam txoj cais ntawm lub teb chaws yeej tuav tswj lawm ces leej twg ua ces cais rau txoj cais ntawm lub teb chaws ntawv rau txim rau tu ua lawm xwb, es kom ua los ua txij nws, npam lo npam txij nws xwb ... Txwv tsis pub ua li tej laus thaum ub lawm.