KEV PAM TUAG

                                                   TXHEEJ TXHEEM KEV PAM TUAG

I. Thawj Lwm Tub Ncig

II. Ntsiab Lug Thiab Hauj lwm Ntawm Cov Thawj Lwm Tub Ncig

 2.1 Tsev Xyom Cuab - Thawj Xyom Cuab

 2.2 Tug Qhuab Ke

 2.3 Txiv Qeej

 2.4 Kav Xwm

2.5 Cuab Tsav

2.6 Tshwj Kab

2.7 Niam Ua Mov

2.9. Tub Sau Ntawv

2.10 Txiv Txiag

2.11 Siv Thawj

2.12 Tshaj Thawj

2.13 Kav Diav

2.14 Ywj Kab

2.15 Niam Duj Zeb Tuav Cos

III. Thaum Muaj Ib Tug Tuag Tu Siav Lawm (Yuav Ua Ca?)

3.1 Tu Zam Rau Tu Tuag Hnav

# Cov Khaub Ncaws (Tsoo Laus) Yuav Npaj Muaj Xws Li:

# Cov Khoom Siv Yuav Npaj Li No:

# Txheej Txheem Tu Zam

# Thaum Tu Zam Tag Yuav Muab Tso Li Nram No:

# Txheej Txheem Laig Thiab Txheej Txheem Ua:

3.2 Cov Khoom Siv Yuav Tau Npaj Ua Ntej Qhuab Ke

      3.3 Txua Tu Nees

3.4 Thov Thawj Lwm Tub Ncig

3.5 Qhuab Ke

3.6 Tshuab Zaj Qeej Tu Siav

3.7 Tsa Nees (Qeej Tsa Nees)

3.8 Kev Ntawg Ntshai, Su, Hmo

3.9 Txhij Ncig / Cob Hauj Lwm Rau Ib Tsoom Thawj Lwm Tub Ncig (Ua Ntev - Ua Txhij)

3.9 Txhij Ncig / Cob Hauj Lwm Rau Ib Tsoom Thawj Lwm Tub Ncig (Ua Luv - Yooj Yim)

 IV. Kev Hu Hauv Qhuas

 4.1 Tu Tuag Yog Tub Hlua, Ntxhai Hlua (Lo Sis Tsev Neeg Txom Nyem) 

 4.2 Tu Tuag Yog Neeg Laus Muaj Tub Muaj Kiv

 A. Txheej Txeem Kev Mu Hus Hauv Qhua Loj (Hauv Qhua Txooj):

   A.1 Mus Hu Muam Phauj/Txiv Dab Laug Tuaj Tua Nyuj (Hauv Qhua Txooj):

   A.2 Mus Hu Muam Phauj/Txiv Dab Laug Nias Tsum (Hauv Qhua Txooj):

B. Txheej Txheem Kev Mus Hu Hauv Qhua Me (Hauv Qhua Tab):

V. Npaj Ua Hauv Qhua

5.1 Kev Ua Hauv Qhua Loj (Hauv Qhua Txooj):

5.2 Kev Ua Hauv Qhua Me (Hauv Qhua Tab-Xav Qhua):

VI. Hnub Qhua Txw - Thaum Hauv Qhua Mu Txog - Tuaj Txog (Yuav Ua Ca?)

6.1 Kev npaj ntawm kav xwm thiab thawj xyom cuab:

6.2 Txheeb Tsoo

6.3 Kev Faib Hauv Qhua Su

VII. Kev Ua Tsaug

7.1 Ua Tsaug Thaum Kev Neej-Kev Tsav Tuaj Pab

7.2 Ua Tsaug Faib Hauv Qhua Su

7.3 Tiam Txiv Coj Xai

VIII. Lub Rooj Hais Xim

8.1 Saum Lub Rooj Hais Xim (Muaj Ab Tsi?)

8.2 Cov Neeg Zaum Sawm Rooj

8.3 Tus Kev Cai Txheeb

8.4 Kev Cai Txiav Tus Npua Nias Tsum

8.5 Xem Lub Mos Xyom

IX. Hnub Tshwm Tshav (Tawm Nra - Sam Sab)

9.1 Npaj Tawm Tshwm Tshav

9.2 Tshwm tshav (Tawm Nra)

9.3 Ntim Su

X. Coj Tu Tuag Mus Zais

10.1 Thaum Coj Tu Tuag Tawm Mu Zais

A. Npaj Xov Txheej (Ntawv Xov Txheej)

B. Rauv Taws (Cub Tawg) Thiab Npaj Dej Ntxuav Tes Tom Kev

C. Ua Dav Noj Qaib

10.2 Ua Ntej Yuav Khawb Xeev (Lub Qhov Ntxa)

10.3 Ua Suav Huas Tom Ntxa (Ua Ntej Faus)

10.4 Thaum Yuav Faus (Yuav Npoog Av Rau) Saib Vam Saib Khib

10.5 Txiav Tu Nees

10.6 Teem Tshais (Thaum Faus Tag)

XI. Tom Qab Lub Ntees Tiav

11.1 Nquam Nkog

11.2 Tawm Tshais       

                          KEV PAM TUAG - THAUM PIB TXOG THAUM XAUS

I. Thawj Lwm Tub Ncig

    Cov thawj lwm tub ncig thaum muaj ib tug puv 120 xyoo lawm tej laus thaum ub thov li hauv qab no (tab sis txheej tshiab no ce muaj ib txhias tsis thov lawm, vim tsis muaj chaws siv lawm):

1.     Tug Qhuab Ke

2.     Txiv Qeej

3.     Kav Xwm

4.     Cuab Tsav

5.     Tshwj Kab (Txiv thwv)

6.     Niam Ua Mov

7.     Txiv Nkauj

8.     Tub Sau Ntawv

9.     Txiv Txiag

10.  Siv Thawj

11.  Tshaj Thawj

12.  Kav Diav

13.  Ywj Kab

14.  Niam Duj Zeb Tuav Cos

II. Ntsiab Lug Thiab Hauj Lwm Ntawm Cov Thawj Lwm Tub Ncig

2.1 Tsev Xyom Cuab - Thawj Xyom Cuab

Tsev xyom cuab yog tsev neeg uas muaj neeg tag sim neej ntawm lub ntees tuag ntawv, vim lawv niam, lawv txiv tuag, lawv muaj kev nyuaj siab ntxhov plawv heev lawv yuav tsi khoom nrog cov tub ncig ua hauj lwm txij tog-txij peg txij lis thaum pib mus txog thaum muab tu tuag coj mus zais.

Tus neeg uas tsev xyom cuab tsas lo sawv cev tam tsev xyom cuab hu uas “Thawj xyom cuab”

Ce tsev xyom cuab thiaj li tso tas puas tsav yam qav num rau Kav Xwm ua tu cojnoj-cojua tam tsev xyom cuab.

Hos ntawm kev dab-kev qhua mas lawv tso plhuav rau Cuab Tsav ua tu saib-tus xyuas tas nrhos.

Tsev xyom cuab txoj hauj lwm ce yog nyob rawv tos xyom pes-hawm lawv niam-lawv txiv thaum cov tub ncig ua tej kab ke tseem ceeb xws li:

- Xyom thaum txiv qeej tshuab cov qeej ua kab ke

- Xyom hmo hai txiv xaiv

- Pab nrhiav thiab qhia tej khoom siv rau tej tub ncig rau lawv kom lawv tau siv ua lawv tej hauj lwm raws li yuav  tsum ua.

- Xyom cuab nrog kav xwm sab laj txog tej hauj lwm, tej kab ke-tej kev dab-kev qhua, tej kev siv dej-siv cawv, kev noj-kev haus thiab kev siv nyiaj siv txiaj.

- Nrog kav xwb thiab cuab tsav coj cov tuaj pab dag pab zog-pab txiaj pab ntsim mu ua tsaug nco luag tshav ntuj.

- Cov tub-cov nyab xyom cuab yuav tau lo quaj nyiav pauj kev neej-kev tsav, tu txheeb ze uas thaum luag tuaj hlub thiab ua hauv qhua tuaj ntawd (Lub ntsiab lug ntawm kev quaj nyiav pauj kev neej-kev tsav thiab zov qauv no ma ua txhawm rau:

        a. Tsam muaj neeg siab phem tso khoom rau tu tuag; 

        b. Tsam muaj tej txheeb ze chim siab nws xav tuag nws faib khoom rau tu tuag.

       Muaj ntau yam ua xyom cuab yuav tau saib xyuas kom txhob ua txhaum dab qhuas vim tsam tej thaum kav xwm thiab cuab tsav saib tsi thoob tsi txhuas.

 2.2 Tug Qhuab Ke

Tu txiv qhua ke (Txiv taw kev) mas nws tsis muaj hauj lwm ua mu kom kawg lub ntees, tab sis nws kuj yog tu raug nyhav vim nws yog tu xub+ pib ua thawj nqe kab ke nyob hauv lub ntees tuag, nws txoj hauj lwm mas tsua yog tuaj qhia kev rau tu tuag thaum lawv muab tu tuag tu zam tau ntawv xwb, thaum nw qhuab ke tas ces nws tsi muaj hauj lwm ntxiv lawm. Yog nws hos xav pab tsev xyom cuab ua lwm yam qav num lo pab tau, yog nws tsi xav pab lo nws yeej nyob nrog zov hnub zov hmo lawm xwb.

Zaj qhuab ke (https://pubhtml5.com/wjop/wufi/) / (PB11_HMOOB ZAJ QHUAB KE 01):

Tus txheej txheem zaj qhua ke:

v  Tshooj tsim noob tsav (Tsim khoom cuab yeej)

1.     Tsim xyoob tsim txhib ntawg

2.     Tsim dej cawv

3.     Tsim plhauj taub tais laig nyag

4.     Tsim dej ntxuav muag

5.     Tsim qoob loo (hno khob tshaib)

6.     Tsim qaib hauv ncoo

7.     Tsim kau maj kau ntuag

8.     Tsim nee dab nees txaig

9.     Tsim txiag tsim hleb

10.  Tsim ntaub npog ncauj

v  Tshooj phwb noob neej

1.     Taug kab mob kev tuag

2.     Neej dab sib nphoo tshauv

3.     Dej dag nyab ntiaj teb

4.     Tsim nkauj hnub nraug hli

v  Tshooj ua dab vaj dab tsev tsaug

1.     Niam txiv dab rooj paim (rooj tag)

2.     Niam txiv dab qab cub qab cais

3.     Niam txiv dab plaj xaus (rooj txuas)

4.     Niam txiv dab ncej txos

5.     Niam txiv dab ncej tas (Ncej dab ncej qhuas)

6.     Niam txiv dab xwm kab

7.     Niam txiv dab plaj xab

8.     Niam txiv dab rooj tag

9.     Mu muab ntawv rov lo thawj xeeb

10.  Ua tsaug teb tsaug chaws

v  Tshooj mu muab tsho tsuj tsho npluag

1.     Mu muab tsho tsuj tso npluag

v  Tshooj xa mu cuag poj cuag yawm

1.     Ntxwj nyug tu ntaiv nyiaj ntiav kub

2.     Ntxwj nyoog tu ntiav ntuj (rooj vag zeb)

3.     Noog qej qawg qwv qws lub suab quaj

4.     Kab npliaj lag xiv xi, tsov nyuj laug suab quaj

5.     Ntxwj nyug toj roob nqeeb dawm roob tauj

6.     Ntxwj nyug toj kab ntsuab dawm kab ntsig

7.     Ntxwj nyug toj peg zeb zag ncauj teb peg zeb zag lo

8.     Ntxwj nyug toj zeb dag dawm zeb tsov

9.     Ntxwj nyug toj peg chaw yug yaj teb peg chaw yug tshis

10.  Ntxwj nyug nkawm niam txiv mab zov liaj kav dej iab dej daw

11.  Ntxwj nyug toj tshav kub dawm tshav ntaiv

12.  Ntxwj nyug toj peg chaw tev txiv qij txiv dos

13.  Ntxwj nyug toj tsaus huab zoo tsaus nag

14.  Ntxwj nyug toj peg toj luaj xaub, teb peg teb luaj nplua

15.  Ntxwj nyug cuaj ntxug kev khaub lig

16.  Rov mus zov cev ntaj phaub mag rau qab hleb qab ntxas

17.  Rov mus los thawj xeeb ua dua neeg rau ntiaj teb

18.  Mus cuag poj cuag yawm rau ntuj txias teb tsaus, ntuj no teb ntsim

v  Tshooj zais roj zais hneev rov qab

1.     Zais roj zai hneev rov qab

 2.3 Txiv Qeej

Txiv qeej yog tu tseem ceeb ua pag-ua xau rau lub ntees tuag ntawv kom xauv npo mu tas hnub-tas hmo, txoj kev cais ma tsua thov 2 tug tuaj ntau thawj tshuab qeej xwb, yog lub ntees tuag ntawv loj ce nkawv mam thov lwm tu lo pab txiv.

Txiv qeej txoj hauj lwm muaj li yuav piav hauv qab no:

1.     Tshuab zaj qeej tu siav: Tshuab ib zaug thaum tu txiv qhuab ke, qhuab ke tas ce cia li xwb.

2.     Tshuab zaj qeej tsa nees: Tshuab ib zaug thaum tshuab zaj qeej tu saiv tag ces cai li.

3.     Tshuab zaj qeej cob tsiaj: Yog laug tua pes tsawg tu tsiaj ce tau tshuab tag tib si.

4.     Tshuab zaj qeej tsa rog: Tshuab niaj hnub, niaj hmo thaum cob tsiaj, noj tshais, noj sus, noj hmo thiab thaum yuav tshuab tejyam qeej ua kab kev tseem ceeb ntawd.

5.     Tshuab zaj qeej hlawv ntawv: … (qeej tawm nras) … tshuav tsawg zaj qeej ?

6.     Tshuab zaj qeej tawm nras (Ua ntej nqa tu tuag tawm tsev)

(Yog hais tias cov hmoob tsis muaj ntaus rog mas tsis tshuab zaj qeej ntau zog ua hai lo no)

Cov zaj qeej muaj (https://pubhtml5.com/wjop/fnop/) /:

-          Qeej tawm nras

-          Qeej tshais, qeej su, qeej hmo

-          Qeej sawv kev

-          …………?

Yam xyom cuab thiab kav xwm yuav tau npaj rau txiv qeej: 

     Rub ib lub rooj txawb rau ntawm tu qab ncej nruas muab 2-3 hwj cawv (Beer) nrog 2-3 lub khob txawb rau, muab cob ua txiv qeej tug. Txiv qeej muaj cais siv cov cawv ntawv raws li nkawv ntiag tug.

2.4 Kav Xwm

Kav xwm yog tug tsav thawj saib xyaum ta txhua tsav-txhua yam hauj lwm tam xyom cuab ua yuav muaj ua nyob hauv lub ntees tuag ntawv tib si, txoj kev cais mas tsua thov 2 tug xwb. yog lub ntees tuag ntawv loj ce nkawv mam thov lwm tu lo pab txiv (nkawv yuav thov thiab tsi thov lo nyob ntawm nkawv) kav xwm yuav tsum leg cov hauj lwm kom mu txog kiag thaum muab tu tuag coj mu faus kiag.

Cov xyom cuab tsua yog cov tuav xam (lo yog sab laj/Cov pab) ntawm ob tug kav xwm lawm xwb, vim lub sij hawm ntawv cov xyob cuab muaj kev nyuaj siab-ntxov siab ntau yam, ce lawv thiaj tso tag txhua yam rau ob tug kav xwm ua tu tsav thawj.

Thaum cov tub ncig xav tau tej yam ab tsis lo siv nyob hauv lawv txoj hauj lwm xws li:

-          Dej, cawv, xyab, ntawv

-          Lauj kaub, tais daiv, riam, txua, taus

-          Ntaub siv, rooj zaum, thiab lwm+ yam …

Ce kav xwm mam li mu nug xyom cuab, thaum xyom cuab mu nrhiav tau lo yog qhia rau kav xwm lawm ces kav xwm mam li coj mu cob rau cov ua hauj lwm ua yuav siv yam khoom ntawv.

Kav xwm cov hauj lwm mas muaj ntau yam xws li:

-          Nco ntsoov txhib ob tug txiv qeej thaum yuav ua tej kab kev es yuav tau tshuab qeej (tsam txiv qeej hos qaug cawv lawm, lo yog mu qhov twg lawm)

-          Nco nstoov txhib cov tub ncig tej hauj lwm thaum muaj tuaj lawm (tab txawm lawv nyias paub nyias hauj lwm lawm lo xij) txhawm rau kom txhob theem lub sij hawm thiaj ua tiav sais.

-          Txog lub caij noj caij haus kav xwm yuav saib xyuas nqua hu kom cov neeg tuaj ntawv tau noj tau haus… kav xwm yog tu nqua hu suav daws

-          Muaj ib txoj hauj lwm twg yuav txau coob leej ua mas kav xwm yog tu nqua hus kom sawv daws sib pab

-          Yam hauj lwm twg ua tsi yeej kav xwm yuav tsum hu neeg mu ntxiv mu pab, thiab kav xwm mu pab ua kiag kom tiav

-          Kav xwm yuav feeb hauj lwm rau sawv daws ua kom xwm yeem

-          Yog muaj lu sib cav-sib ceg, lu ntxheb-ntxhov tsis sib haum xeeb hauv lub ntees tuag kav xwm yog tu lo tham kom cuaj pluag sib luag yim pluag sib nte.

-          Txog hnub qhua txws mas ob tug kav xwm yuav tsum tos txais cov hauv qhua, txais ntawv, txais kawm, txais pob tawb nrog rau tej tshav ntuj thiab lwm yam luag nqa tuaj.

-          Kav xwm yuav tau nrhiav 2-3 tug tub xyom cuab lo ua tsaug thaum txai tej txiaj ntsim (Tiag+ thaum kav xwm txai tau lawm kav xwm yuav tsum ua tsaug ua ntej, kav xwm mam coj mu rau cov tub xyom cuab mu ua tsaug)

-          Thaum cov hauv qhua tuaj txhij tas, mas kav xwm yuav txib cov tub ncig mu npaj ib lub rooj faib hauv qhua su thiab xem tshwj.

-          Kav xwm yuav coj xyom cuab thiab cov hauv qhua mu sib fim noj hauv qhua su es ua luag tsaug nco luag tshav ntuj

-          Thaum txog hmo hais xim (Yog muaj hai xim) kav xwm yog tus txhib thiab npaj tas txhua yam rau ntawm lub rooj hais xim ntawd.

-          Raws li kev cais tiag+ yog ob tug kav xwm paub txheej txheem hais txiv xaiv thiab txawj cov zaj txiv xaiv mas ob tug kav xwm yog ob tug hai txiv xaiv kiag xwb mas thiaj yog, yog ob tug kav xwm tsi txawj hais ce xyom cuab yuav tau thov lwm tu txawj tuaj hais txiv xaiv, ce thiaj cia ib tug kav xwm los zaum phim xwb.

-          Txog hnub tshwm tshav ob tug kav xwm yuav tau mu saib xyuas kev feeb hauj lwm thiab kev faib nqaij tu moo rau cov hauv qhua thiab cov tub qa-tub num,

-          Thaum noj mov kav xwm yuav tau txheeb kom txhua tu tau lo noj plua mov tu moo kom kev neej-kev tsav-kev zej kev zos txhob tu siab rau tsev xyom cuab.

-          Vim kav xwm ua tu txais cov txiaj ntsim tshav ntuj uas kev neej-kev tsav coj tuaj pab tsev xyom cuab los yog tej yam coj tuaj nta tu tuag ntawd (Kav xwm yuav tsum nrhaiv 2 tug neeg lo sau ntaub sau ntawv kom muaj neeg nyob xwm yeem, kom sau tau tej dej cawv, nplej, txhuv thiab nyiaj txiag ua tuaj pab ntawv kom muaj qab muaj haus, Kom tuav tau kev siv nyiaj mu lo ntawm lu ntsees tuag ntawv thaum pib mu txog thaum muab tu tuag mu faus tas)

-          Kav xwm yuav tau lo qhia cov txiaj ntsim thiab cov kev pab ua tau txais thiab tej nyiaj txiag ua tau siv mu tag li ca, hos tshuav li cas, ces muab cob rov qab rau tsev xyom cuab.

Cov zaj txiv xaiv muaj (https://pubhtml5.com/wjop/texe/) / (PB08_NTAWV TXIV XAIV - Txujci Hmoob - Page 1 – 40):

v  Cov zaj fi moo thiab hu qhua

1.     Zaj fi mooo, Piv txwv li hu muam phauj

2.     Zaj hu qhua theem 1 piv txwv li hu rau muam phauj

3.     Zaj yig tsis lees – niam txiv ib plab yug

4.     Zaj yig tsis lees – tsis yog niam txiv ib plab yug

5.     Zaj hu qhua theem 2 zaj lwg piv txwv muam phauj

v  Cov zaj qhib phiaj

1.  Zaj tswm qeej – tswm nruas

2.  Zaj txhib tshawj kab taws teeb

3.  Zaj rub rooj – txheeb qhua nce tsum

4.  Zaj nqua xyom cuab los xyom

5.  Zaj saub phwb noob neej

6.  Zaj tswm txwj laus

7.  Zaj tswm xyom cuab

8.  Zaj tswm nkauj – tswm nraug

9.  Zaj raws txiv coj xai

10.  Zaj thuam txiv coj xai

11.  Zaj thuam rooj hai xim

12.  Zaj thuam rooj hai xim ntu 2

13.  Zaj phwb kab mob kev tuag

14.  Zaj qhia mob, nrhiav neeb nrhiav tshuaj kho

v  Cov zaj cob qhua – Raws qhua

1.     Zaj sam hwm kom txhob sib nruab – sib twv

2.     Zaj cob txiv tuam pem – txiv yawm thaj xyoob

3.     Zaj cob muam phauj

4.     Zaj cob txiv dab laug

5.     Zaj cob txiv npaws

6.     Zaj cob txiv xov dab

7.     Zaj cob cuas nyab

8.     Zaj cob cuas ntxhais

9.     Zaj cob xeev txwj laug theem 1

10.  Zaj cob xeev txwj laug theem 2

11.  Zaj cob txiv txiag

12.  Zaj cob txiv qeej txiv nruas

13.  Zaj cob txiv thwv

v  Cov zaj cwb qhua lwm 2

1.     Zaj nug txiv tuam pem seb pua muaj tsiaj txhua

2.     Zaj ceeb toom tsis muaj tsiaj txhua

3.     Zaj tseg muam phauj txiv dab laug tsis muaj tsiaj tua

4.     Zaj cob nyuj, cob kos taus (Piv txw cob muam phauj)

5.     Zaj tso nyiaj, txai hlua nyuj (Piv txw muam phauj)

6.     Zaj ua tsaug txais plig tsiaj - plig nyuj

7.     Zaj cob txiaj ntsig rau txiv tuam pem

8.     Zaj cob dab ntsuag – cob tub ntsuag

9.     Zaj cob dab ntsuag nqe 2, cob txiv dab laug nias tsu

10.  Zaj cob dab ntsuag nqe 3, cob rau txiv tuam pem

11.  Zaj cob neej xub qeeg

12.  Zaj cob qauv

v  Cov zaj taij kom thiab foom kom

1.     Zaj txhib qhuas raw plig

2.     Zaj taij qhuas raw plig

3.     Zaj foom kom ntu 1 qhuab qhia xyom cuab

4.     Zaj foom kom ntu 2 qhuab qhia xyom cuab ua neej

5.     Zaj foom kom ntu 3 txam mem toj mem av

6.     Zaj nkauj rooj – tuam rooj

7.     Zaj nkauj cwj xaiv – cwj lus

8.     Zaj tsa tub xyom cuab

Qhia Kom Paub: 

     Nyob rau sab mekas muaj ntau lub ntees tuag tsis hai xim lawm (Tsis muaj hu nkauj foom kom lawm, Tsev twg tub kis nyiam ces mam ua lawm xwb)

2.5 Cuab Tsav

Cuab Tsav yog tu coj dab qhua, Cuab Tsav txoj hauj lwm yog:

-          Laig nqaij - laig mov (Ntawg Tshaib, Su, Hmo)

-          Ntawg tsiaj

-          Ntawg txhuv

-          Ntawg xyab-ntawv

-          Ntawg khaub ncaws – tsoo laus

-          Laig tej nqaij – mov hauv qhua nqa tuaj ntawv rau tu tuag.

Vim li no mas tu Cuab Tsav yuav tsum yog ib tug kwv tij ua paub dab qhua zoo (Paub qab hau) ntawm tsev neeg ntawv (Yog tseem muaj neeg txhob thov tus sab nrauv tuaj uas). Vim Cuab Tsav yog tus coj ua kev cais dab qhua hauv lub ntees tuag tam tsev xyom cuab, nws nrog xyom cuab sib tuav xam txog txhua tsav txhua yam ntawm kev ua dab ua qhua rau tu tuag kom txhob yuam kev txhob txhaum caj ce dab qhuas.

Cuab Tsav ua tu txais cov txiaj ntsim uas kwv tij neej tsa coj tuaj pab rau tsev xyom cuab thiab tu tuag, nw yog tu yuav ua luag tsaug ua ntej ce mam coj mu cob rau xyom cuab kom nco luag tshav ntuj.

Yog cuab tsav muaj nyuj ntau: Yog muaj nyuj ntau mas cuab tsav tseem raug ua ib hau qhua txooj tuaj hlub thiab.

Yog cuab tsav tsis muaj nyuj ntau: Yog tsis muaj nyuj ntau ce tsuas ua ib hauv qhuas tab tuaj hlub xwb.

Cuab Tsav: kuj yog tu thawj zaum ntawm rooj hais xim, nws yog tu txheeb txoj kev iab-kev khwv ntawm tu tuag txij nkawm thiab cov tub kiv rau tus tuag kom 9 pluag sib luag 8 pluag sis nte.

Tej laus thaum ub tsua thov “Tus Kwv” tuaj ua tu Cuab Tsav nkaus xwb, Tab sis txheej niam no ces tsuav yog ib tug paub dab qhua xwb ces yeej siv tau tag nrho, tseem yog tu tij laug lo yeej tau, tseem yog lwm xeem hmoob lo yeej ua tau (qhov twg nws tsis paub zoo nws mam nug tu kav xwm xwb).

2.6 Tshwj Kab

Tshwj kab (Txiv thwv) yog tu neeg lis noj-lis haus rau tsoom neeg tuaj ua hauj lwm thiab cov neeg tuaj zov hnub-zov hmo hauv lub ntees tuag ntawd (Tsua thov 2 tug xwb, yog hauj lwm ntau nkawv mam thov neeg pab ntxiv).

Tshwj kab cov hauj lwm muaj li no:

-          Tua tsiaj thiab tseev cov tsiaj ua luag tua rau tu tuag ntawd

-          Hau nqaij- hau zaub  thiab rau mov - rau mov noj txhua pluas (txij thaum pib mu txog thaum xaus)

-          Ib hnub npaj 3 pluag (Tshai, Sus, Hmo)

-          Npaj rooj-tog (rau mov noj)

-          Ua tej yam hauj lwm kav xwm thov kom pab uas

Txog hmo yuav hais txiv xaiv mas tshwj kab kuj raug nrog luag zaum ntawm lub rooj hais xim nrog luag txheeb-txiv tu tuag txoj kev iab-kev khwv.

Yog muaj hauv qhua hu mas kav xwm tseem yuav txib tshwj kab mus hu ib hauv qhua tuaj hlub tus tuag thiab (Yog tsi txib-tsi hu lo tau).

Tshwj kab tseem ceeb yuav tsum muaj txhua txhua lub ntees

2.7 Niam Ua Mov

Niam ua mov (Niam fam txam) yog ob tug ua mov noj, feem ntau lawv yuav xaiv ob tug hlua nkauj laug lo yog poj nrauj, poj ntsuam kom txawj ua zaub ua mov tuaj ua ob tug niam ua mov (Qhov feem ntau phej xaiv cov no mas vim yog xav xaiv tu kom twb txawj+ ua mov noj lawm xwb thiab kom txhob muaj txiv es thiaj nyob tau tas hnub tas hmo xwb).

Thaum kav xwm thiab xyom cuab qhia txhuv rau, muab hauj lwm cob rau tag lawm ces ob tug niam ua mov txoj hauj lwm yog:

-          Mu nrhiav qhov cub

-          Lauj kaub

-          Tsus cub mov tej lo cia, yog yam twg tsis muaj ce nug kav xwm

-          Ob tug niam ua mov yuav tsum ua mov kom txau cov neeg tuaj koom lub ntsee ntawd sawv daws noj.

-          Txheej thaum ub mas ob tug niam ua mov tau mu pab niam duj zeb tuav cos thiab pab tshwj kab ua yam puav (Tab si txheej no tsi muaj tuav cos lawm ces tsis muaj lawm)

-          Ua tej yam hauj lwm kav xwm thov kom pab uas

Niam ua mov tseem ceeb yuav tsum muaj txhua txhua lub ntees

2.8 Txiv Nkauj

Txiv nkauj yog ib tug ua kav xwm thiab xyom cuab thov tuaj hu nkauj (ua txiv nkauj) nyob hauv lub ntees tuag ntawd (Yog tia lub ntees tuag ntawv loj thiaj muaj, yog lub ntees me ce tsi muaj tu txiv nkauj los tau) Raws li kev cais ma luag tsua thov ib tug tuaj ua tu thawj xwb, yog tu txiv nkauj tsis muaj cov nkauj lam hnub-lam hmo ntawv los nws mam thov lwm tus los pab nws hu ntxiv.

Txiv nkauj yuav tsum nyob rawv hauv lub ntees tuag (yog tia muaj) mloog ntsoov txiv qeej hu xiv nkauj, nw yog tu yuav hu nkauj txhua lub caij thaum yuav ua tej yam kab kev xws li:

-          Tshuab qeej tu siav, yuav hu zaj nkauj tu saiv

-          Tshuab qeej tsa nees, yuav hu zaj nkauj tsa nees

-          Tshuab qeej cob tsiaj, yuav hu zaj nkauj cob tsiaj

-          Tshuab qeej tshais, yuav hu zaj nkauj tshais

-          Tshuab qeej sus, yuav hu zaj nkauj sus

-          Tshuab qeej hmo, yuav hu zaj nkauj hmo

-          Tshuab qeej hlawv ntawv, yuav hu zaj nkauj hlawv ntawv

-          Tshuab qeej sawv kev, yuav hu zaj nkauj sawv kev … thiab lwm+ zaj lo ib yam.

Txiv nkauj txheej no yog cov ntees tsis loj tiag tiag ces tsis tshua muaj lawm (Ntau lub ntees tsis thov tus txiv nkauj no lawm).

2.9. Tub Sau Ntawv

Tub sau ntawv yog 2 tug ua kav xwm thov lo sau ntaub sau ntawv pab kav xwm, tub sau ntaub sau ntawv txoj hauj lwm yog sau txais tej txiaj ntsim ua kwv tij neej tsa tuaj pab:

-          Sau kev pab nyiaj pab txiaj

-          Sau kev pab dej, cawv, tsiaj txhuv thiab mov noj

-          Sau kev siv nyiaj-rhos nyiaj thiab khaws nyiaj

-          Lo qhia cov txiaj ntsim tau pab thiab kev siv nyiaj ntawm lub ntees rau kav xwm (Ce kav xwm mam coj mu qhia rau tsev xyom cuab).

Txheej niam no ob tug tub sau ntawv no tseem ceeb yuav tsum muaj.

2.10 Txiv Txiag

Txiv txiag yog ob tug txiv hleb txiv ntoo, nkawv txoj hauj lwm yog ua lub hleb rau tug tuag, Raws kev cais luag xaiv ma xaiv ob tug txiv neej yawg khov khos muaj zog thiab txawj txua hleb. Yog me nyuam yau tuag ce lawv thov ib tug xwb tsi thov ob tug.

Txheej thaum ub ob tug txiv txiag yog ob tug mu nrog xyom cuab nrhiav ntoos thiab npaj taus, piab, txaug (muab hov kom ntse yuav siv mus txua lub hleb) Tab sis txheej niam no feem ntau yeej ua tau thiab mu yuav cov ua tiav lawm xwb ce tsis thov txiv hleb txiv ntoo lawm.

Yog muaj hauv qhua hu mas kav xwm tseem yuav txib txiv txiag mus hu ib hauv qhua tuaj hlub tus tuag thiab (Yog tsi txib-tsi hu lo tau).

Yog tia muaj txog hmo hai xim nkawv kuj raug zaum saum rooj hais xim nrog txheeb, nrog txiv tus tuag ntawv txoj kev iab, kev khwv thiab (Yog tsi muaj txiv txiag ce tsi rub neeg lo zaum li).

Lub ntees twg npaj tau lub hleb, lo yog yuav lub hleb lawm ces tsis thov ob tug txiv txiag no lawm.

2.11 Siv Thawj

Siv thawj yog tub kwv dej, yog tu neeg nqa dej siv ua zaub-ua mov thiab kom cov neeg hauv lub ntees taug tau dej haus. Thaum ub mas tom qab kav xwm thiab xyom cuab cob hauj lwm tag rau mas siv thawj yuav tau mu nriav raj nrhaiv thoob coj mu kwv dej lo tau siv. Tab si txheej tshiab niam no dej siv tsis nyuaj lawm ce kuj tsis thov ob tug siv thawj no lawm. (Lub zo twg dej siv nyob deb tseem muaj ob tug siv thawj)

Yog muaj hauv qhua hu mas kav xwm tseem yuav txib siv thawj mus hu ib hauv qhua tuaj hlub tus tuag thiab (Yog tsi txib-tsi hu lo tau).

Thiab ua tej yam hauj lwm kav xwm thov kom pab uas.

Txheej no ces muaj ntau lub ntees tsis thov tu Siv Thawj no lawm, vim muaj dej siav ywj saib lawm (muaj ນ້ຳປະປາ thiab muaj cav nqus dej lawm).

2.12 Tshaj Thawj

Tshaj thawj yog tub txiav taws - txhib taws coj lo rau cov ua zaub ua mov tau siv.  Thaum ub mas tom qab kav xwm thiab xyom cuab cob hauj lwm tag rau mas tshaj thawj yuav tau mu nriav taus, txuas, khib-kawm ce mu nrhaiv txiav cov taw qhuav tom hav zoov lo tau rauv ua zaub ua mov noj. Tab sis txheej tshiab niam no tsis muaj taws txiav lawm thiab feem ntau npaj tau lawm ce kuj tsis thov ob tug tshaj thawj no lawm.

Yog muaj hauv qhua hu mas kav xwm tseem yuav txib tshaj thawj mus hu ib hauv qhua tuaj hlub tus tuag thiab (Yog tsi txib-tsi hu lo tau).

Thiab pab ua tej yam hauj lwm kav xwm thov kom pab uas

Txheej no ces muaj ntau lub ntees tsis thov tu Tshaj Thawj no lawm, vim tsis muaj taws rau txiav lawm tab sis feem ntau yeej npaj tau lawm sawv daws cia li sib pab txhib lawm xwb (Muaj tej lub ntees tseem pom muaj tab sis yog thov lo pab txhib taws lawm xwb).

2.13 Kav Diav

Kav diav yog tu npaj tais-paj diav rau sawv daws noj mov nyob hauv lub ntee tuag ntawd, kev cais mas luag tsua thov ib tug tub hlua tuaj ua xwb.

Tu kav diav txoj hauj lwm yog:

-          Qiv tais

-          Qiv diav

-          Thiab thaum noj mov tas nws pab ob tug tshwj kab ntsaig mov thiab coj mu ntxuav kom huv sis cias

-          Thiab pab ua tej yam hauj lwm kav xwm thov kom pab uas

Txheej no ces muaj ntau lub ntees tsis thov tu Kav Diav no lawm, vim cias li siv cov nyab xyom cuab lo pab niam ua mov thiab tshwj kab lawm xwb.

2.14 Ywj Kab

Ywj kab yog tus taws teeb, raw li txoj kev txoj cais thaum ub luag yuav thov ib tug tub hlua tuaj ua tus taws teeb (vim tsi tau muaj hluav taws xob) kom lub tsev ntees tuag ntawv pom kev thawm hmo.

Txheej thaum ub tom qab kav xwm thiab xyom cuab muab hauj lwm cob rau tu ywj kab lawm mas nw yuav tau npaj li no:

-          Mu npaj txiav tsau (xyoob lo yog thuv) coj lo phua pav ua pob tau siv

-          Nws taws teeb thiab muab cov tsau mu taws rau tej chaw ua hauj lwm kom pom kev

-          Nws hloov pauv cov tsau kom ciaj tas mu lis thiab cig lam lug.

Txheej no ces tsis thov tu Ywj Kab no lawm, vim muaj hluav taws xob taws cig lam lug lawm.

2.15 Niam Duj Zeb Tuav Cos

Niam duj zeb tuav cos yog ob tug tuav txuv thiab zom zeb (tuav txhuv-zom txhuv), raw txoj cais ma luag thov ob tug hlua nkauj laug lo yog poj nrauj, poj ntsuam xwb (Qhov feem ntau phej xaiv cov no mas vim yog xav xaiv tu kom twb muaj+ zog thiab twb txhawj tuav cos-zom zeb lawm xwb thiab kom txhob muaj txiv es thiaj nyob tau tas hnub tas hmo xwb).

Txheej thaum ub tom qab kav xwm thiab xyom cuab muab hauj lwm cob rau lawm mas ob tug yuav tau npaj li no:

-          Yog lub teb chaw muaj nplej ces ob tug yuav tau mu tuav txhuv, tsoov txhuv

-          Yog teb chaws tsis muaj mov noj ce yuav mus dhas pob kws coj mus xuas zeb zom kom mos+ mam muab tshau yuav cov hmoov.

-          Thaum npaj tau lawm mam coj lo cob rau ob tug niam fam txam (Niam ua mov)

-          Dhau no lawm nkawv kuj pab niam ua mov thiab tshwj kab (yog tia hauj lwm ntau es kav xwm txib kom nkawv pab)

Txheej no ces tsis thov tus niam duj zeb tuav cos no lawm, vim muaj tshuab zom txhuv lawm (Cov tshuab zom txhuv txheej tshiab no twb tsis tau tsoov lawm thiab).

### Txhais lus:

1.     Txhib ntawg yog dab tsi? 

T         Txhib ntawg yog ib ya xyoob uas koj mus txiav los luaj nkaus li tus ntiv tes es muaj 1 lub pob quas hauv lub nrab, muab nws hliav ob tog, sab tov tuaj thiab sab tom no mus ces muab phua ua ob sab coj los ua tus kuam ntaus rau tus tag sim neej kom nws lees tej xyab tej ntawv thiab tej dej cawv uas tus cuab tsav laig rau nws (Thaum txiav muab tes tuav ib teg nyem nkaus tsa tus ntiv tes xoos, kom txog ntua tu ntiv tes xoo xwb ces zoo lawm, thaum phuas yuav tau pua ua 2 sab, muaj  ib sab yog lub pob nrog, hos ib sab tsi muaj pob) qhov phua li no mas yog phua kom thaum ntau tus txhib ntawg thiaj ib sab khwv sab ntxeev (es thiaj siv yooj yim) (Qaum pob 3 ntis, qab pob 2 ntis)

2.     Cwj Mag Cwj Ntuag Yog Dab Tsi? 

           Yog ib tug pas uas koj muab txiav thiab phua kom nws me zog tus ntiv tes rhw qab ces koj mam ho muab phua me ntsis pem lub hau ces koj txiav ib co hlua maj kom ntev li ib ntiv tes , ntev zog los tau ces muab rhais rau ntawm tus hau pas uas koj phua,  yog tsis muaj hlua maj ces siv hlua hnab tsaj los tau ib yam nkaus. Tus pas no yuav ntev li 1 feej los yog 1 dos tawm me me,   los yog tias ntev li tus rawg koj noj fawm xwb los tau,  nyob ntawm seb qhov chaws siv ntawv koj siv ua ab tsi xwb, yog koj yuav siv ntev ces koj mam txhiav tu kom ntev xwb (Kom thiaj tsi khaum kev).

      Qhia Kom Paub, Txog Kev Pe: 

Hmoob txoj cais ma thaum mu thov cov thawj lwm tu ncig sws li: tu qhuab ke, txiv qeej (ua tshuab zaj qeej tu siav), cuab tsav, tshwj kab kav xwm, niam ua mov…  (Tag nrho cov thawj lwm tu ncig) no mas tsis pub pes tom luag tsev (Cias li thov ces lo lawm xwb thaum tuaj txog lawm mam pes).

Qhov tsi pub pes tom luag tsev ma yog peb ntseeg hai tia peb mu hai nws xwb xyov nw yuav lees lo tsi lees, yog nws tuaj lawm ce thiaj yog nw lee lawm thiaj mam pes thaum lo txhij ncig / cob hauj lwm rau.

III. Thaum Muaj Ib Tug Tuag Tu Siav Lawm (Yuav Ua Ca?)

3.1 Tu Zam Rau Tu Tuag Hnav

# Cov Khaub Ncaws (Tsoo Laus) Yuav Npaj Muaj Xws Li:

3 - Ce khaub ncaws laus

1 - Lub tsho tshaj sab

1 - Nkawm Nrhoob

1 - Nkawm khau noog 

1 -  Nkawm khau maj

# Cov Khoom Siv Yuav Npaj Li No:

1 - Taig dej (Los yog rhaub ib hwj kais dej sov so)

1 - Txoj phuam (Yuav siv lo ntxuav)

1 - Lub tog zaum 

Poj Niam - Yog tus tuag yog pojniam ces yuav muab ib lub kawm khwb (Lub tog mas haj yam zoo) rau hauv plag tsev cia nws zaum saum lub qab kawg 2-3 tug tub nyab los sib pab tuav, muab ntxuav muag , ntxuav tes taw tag ces mam kho ris tsho rau hnav.

Txiv Neej - Yog Tus tuag yog txiv Neej ces muab ib lub rooj coj los tso rau ntawm plag tsev rau nws zaum 2-3 tug tub nyab los sib pab tuav, muab ntxuav muag , ntxuav tes taw tag ces mam kho ris tsho rau hnav.

Qhia Kom Paub, Hlob Vam Lauj yog tu paiv: 

     Qhov thaum ub tej laus muab lub Kawm rau tus pojniam zaum no mas yog hmoob thaum ub saib tsis tau tus pojniam ce thiaj muab lub kawm qub qub rau zaum, zaum tag ces yuav muab coj mu pov tseg xwb (Vim tsis xav muab lub tog coj mu pov tseg ces thiaj ua li ntawv) tiag tiag mas yog tu pojniam tu txiv neej lo yuav tsum muab lub tog rau zaum xwb mas thiaj yog.

# Txheej Txheem Tu Zam

- Muab tu tuag zaum tig xub ntiag rau nram qhov rooj tag

- Maub txoj phuam ntub dej sov coj lo sos ntsej muag (Ntxuav muag)

- Mam muab ris tsho kho rau hnav (Kho cov me ua ntej, mam kho cov tshaj sab tom qab)

- Yog poj niam txhob khos ris rau hnav (yog hnav ua ntej lawm lo muab hle)

- Thaum tus zam tag lawm muab muab peb txoj hlab ntaub coj los khis tus tuag peb ntus kom ruaj

- Thaum tus zam tas lawm mam li tua 3 phom ua nws luag, ces sawv daws mam li quaj nyiav raw kev sib hlub (Txheej niam no tsi tua phom lawm, Vim txoj cais tsis pub tua phom thiab sawv daws tsis muaj phom lawm).

Qhia Kom Paub:

Ntawm cov ris tsho yog muab swb, muaj khawm yuav tau muab hlais pov tseg tsos mam khos rau hnav nawb, Peb hmoob muaj ib txoj kev ntseeg tias tsam lwm hnub nws tsi lwj ces nws fam rau tej tub kiv, ces lo ua mob ua nkeeg no.

    # Thaum Tu Zam Tag Yuav Muab Tso Li Nram No:

     - Muab xyab ntawm ncej tas (tso Kos Taws tig rau pem hauv plag, Taub hau tuaj rau nram ncej tas (Mloog nrua)

      - Thaum coj tu tuag mu tso rau pem hauv plag, Taub hau tuaj puab tog rooj txuas (Nees dai)

      - Yuav dai lub nruas rau ntawm tu ncej tas

  # Txheej Txheem Laig Thiab Txheej Txheem Ua:

      - Txheej cawv laig, poj niam-txiv neej los 3 txog cawv ib yam (Ntawg tshai, Su, Hmo, ntau rog) tsua yog hais qhov ntawg ntawv xwb.

       - ib tawm rog xwb (Tshai, Su, Hmo), poj niam 3 ncig mu 2 ncig rov (5 Ncig), txiv neej 4 ncig mu 3 ncig rov (7 ncig).

      - Tsa rog siv 2 tug neeg (tu ua ntej nqa rab hneev taub, tus lawv qab tshaub lub raj thiab nqa rab hneev ntis, thaum lo txog ntawm rooj tag rooj txua nws tshuab thiab qws yom tes rau nraum zoov).

       - Ncig tshauv  (Poniam 5 ncig, txiv neej 7 ncig, ncig txij lub nrua rov pev xwb)

       - Tuas tsawg tus tsiaj nram tswg ces txua noog mus rhais rau nram qab tsawg tus

       - Ntawm tu qaib ncoo tsi pub hlais caj pas (Muab nyem caj pas kom tuag, ces tho ntawm tav muab lub siab coj lo laig rau tu tuag) 

3.2 Cov Khoom Siv Yuav Tau Npaj Ua Ntej Qhuab Ke

-          1 - tug lau qaib liab qua qaws zoo nkauj rhib (Qaib Ncoo)

-         1 - lub plhauj taub / thoob / thawv coj lo rau tu qaib ncoo thiab tej zaub mov ua laig (lo yog ib lub pob tawb)

       1 - lub hwj cawv, yuav coj lo ntim cov cawv laig

       1 - rab hneev nrog ib xib xub (muab sam, cuam xib xub rau) 

      1 - ib rab hneev ntis (khis ib txog khaub hlab dub rau) thiab 1 - lub raj kub twg  (daim khaub hlab yog tu chij, lub roj yog lub tshuab txhib rog).

-          1 - lub khob, 1 - rab daiv, 1 - lub qe (muab hau kom siav), 1 - qho mov saiv

-          1 - tug txhib ntawg xyoob (Muab ntsua qab pob 2 ntis, qaum pob 3 nti phua ua 2 sab)

-          1 - lub tais laig nyag thiab 1 - tais dej sov

-          1 - lub kaus ntawv thiab 1 - nkawg khau maj

       1 - tug nees (Fiab ib tug nees, Siv xyoob lo tau ntoo lo tau)

-          1 - tug npua tsa nees

-          1 - ntshua ntawv vam sab (Tag tub nyab ntxhai vauv yuav ib ntshua xwb)

       1 - teg xov txeej thiab 100 -200 lub yaj khaum yeeb khaum (Yuav muab hlawv rau nws coj mu siv taug kev, them raus qub teb qub chaws).

     3.3 Txua Tu Nees

Txua / fiab ib tug nees rau tug tuag, Kev txua tu nees txiav ntoo (Xyoob lo tau) txiav li no:

-          2 tug loj ntev khov (ua qhov kom zoo kwv-zoo nqas) yuav siv lo zoj tu tuag

-          3 tug luv (1 tug tso hauv lub nrab tus nees, 2 tug tso rau ob sab)

-          Muab fiab 3 ntus ntawm tu nees no kom khov ce mam tsum.

       Qhia Kom Paub: 

Hai txog ntawm tus nees yog tia muaj lub hleb thiab yog muaj lub tsheb thaub tu tuag mu faus lawm ces txua tus me me kom ntev li 1 tshim npab coj lo ua dab ua qhua thiab coj lo tsos rau ntawm lub hleb ib sab xwb lo yeej tau lawm (Kom thaum mu txog tom toj ntxas tau coj lo txiav ua kev cais xwb).

3.4 Thov Thawj Lwm Tub Ncig

Thawj xyom cuab thiab tsev xyom  cuab sab laj mu thov cov thawj lwm tub ncig, cov tub ncig muaj li nram no:

1 - Tug qhuab ke (Txiv taw kev)

2 - Tug txiv qeej, txiv nruas (Thov 2 tug xwb, nkawv mam thov ntxiv)

2 - Tug kav xwm (Tsav Thawj)

1 - Tug cuab tsav (Yog tu coj kev cai dab qhuas)

2 - Tug tshwj kab (Txiv thwv, thov 2 tug xwb nkawv mam thov ntxiv)

2 - Tug niam ua mov (niam fam txam)

1 - Tug txiv nkauj

2 - Tug tub sau ntawv

Muaj tub ncig tej tug yuav tau thov ntxiv yog tia yuav tau siv (Nyob ntawm thaj chawm, Txheej no twb tsis tshuas thov cov hauv qab no lawm):

-          Txiv ntxiag – txiv hleb txiv ntoo

-          Siv thawj

-          Tshaj thawj

-          Ywj kab

-          Niam duj zeb tuav cos

# Kev Thov Thawj Lwm Tub Ncig:

-          Nqa 1 hwj cawv, 2 lub khob (4 lub lo tau) ce mu rau ntawm tu neeg ua tsev xyom cuab yuav thov dag thov zog tsev.

-          Nug seb pua caiv yog tsi caiv mam nkag mu hauv tsev.

-          Thov nws lub rooj coj los txawb rau ntawm plag tsev.

-          Rub nws zaum pem toj

-          Teev cawv rau ib lub khob cev rau nws (Tu yus yuav mu thov zog) thiab ib lub rau koj

-          Coj nws cub cawv (hau me ntsis xwb) ce tsa ncauj hais tia:

=> “Hnub no wb tuaj no mas tsis muaj ab tsi nawb, tab sis vim yog lub ntuj tsis nqus tes , ntuj nqus taw yog li ntawv tus yawg los yog pog....(npe hu li no)......tau tag sim neej lawm thiaj li tuaj thov txog koj dag koj zog mus pab ua “txiv cuab tsav” mus ntoj nws dab tu nws qhua, yeej paub ntsoov tias koj dej num muaj ntau ntxhov lis hnyo koj lub luaj qoob los......................... lo thov koj tso qav tso mum tseg es thov koj tuaj pab peb tsev xyom cuab, es txhob tso tsev xyom cuab pov tseg no laud.

(Cov lus thov no txawv tsis deb tsuas yog koj hloov npe seb yog thov tu twg ce hais raws nws qhov hauj lwm “tshwj kab, tus niam ua mov los yog tus kav xwm xwb”)

3.5 Qhuab Ke

Tu qhuab ke xub+ pib ua ntej thaum lawv muab tu tuag tu zam tau, thaum npaj tau cov cuab yeej siv lis nqes 3.2 sauv lawm. 

Thaum npaj tau lawm ce mam pib qhuab ke, tu qhuab ke yuav tau lo zaum ntawm tus tuag ib sab puab rau tog txuas, ib sab tes tuav tus txhib ntawg xyab tes mus rau tu tuag ces txawm pib hais tuav tu tuag lub npe  hais li no:

=> “Nov os! … Kuv ncig yeev tuaj txog koj rooj tag tsis hnov koj lub suab ha, kuv ncig yeev tuaj txog koj lub rooj txua tsis hnov koj lub suab luag, leej hlob los hais tia koj tuag, leeg yau lo hais tia koj tuag, tuag tseeb lo tuag cuav, tuag dag ce sawv lo ncig qav ncig num, ncig vaj ncig loog, tuag tiag no ces tig muag lis ywm rau tom ntej tig ntsej lis ncuv los mloog tuaj tom qab kuv yuav hu nkauj dab lus taum pub rau koj mloog no tod!!

Tig loo seev suab ua suab lus taum hais, thiab saib tus tuag yog pojniam mas hus ua “Nkauj ntxiag muam nkauj qeeb” yog txiv neej mas hus ua “Nuj ntsuag txiv nraug txiag”

Hai zaj qhuab ke (Zaj Qhua ke – Zaj taw kev) ntxiv mu kom tag.

Qhia Kom Paub:

     Thaum txiv taw kev taw kev tag ..? ces yuav tau laig lub qe nrog qhov mov ua hno qho tshaib thiab ntawg tus qaib; laig siab qaib rau noj thaum txiv taw kev tiav lawm mam tso rau txiv qeej tshuab qeej tu siav xa mus.

3.6 Tshuab Zaj Qeej Tu Siav

Thaum qhuab ke tas lawm mam li pib tshuab zaj qeej tu saiv. Yog xyom cuab npaj txhawm tau yuav tau txaug ib ntshua ntawv, thaum txiv qeej tshaub qeej zais roj zais hneev, txiv qeej yuav hlawv rau tus tuag thaum ntawv. (Ntsua ntawv no txawm tsis muaj lo tsis ua cas)

3.7 Tsa Nees (Qeej Tsa Nees)

Yuav tsum npaj kom tau 2 yam li hais no:

1. Fiab/Hiab kom tau tus nees

2. Ib tug npuas

# Txheej Txheem: 

- Thaum txiv qeej kom nqa nee los (mam nqa nees los)

- Hmoob vaj ntxoo yog Nees Txais (Nee dai): Los Rooj Tag Lo – Lwm hnub Tawm Rooj Tag Mus

- Thov ob tug neeg los Nqa tus nee los txog ntawm lub qhov rooj tag ces  muab ntsawm 3 teg, los txog ntawm tag ntsawgm 3 teg,  txog pem hauv plag ntsawm 3 teg tag mam muab tus tuag tsaw rau (ces mam muab zoj) tig tog taub hau rau tog rooj txuas.

- “Npua tsa Nees” yog muab tus npua cob rau tu tuag coj mu ua noob tsiaj noob txuv lawm yeeb tim teb ce tej laus hus hais tias “Tsa Nee” no xwb, thaum txiv qeej tshuab qeej (ntawg tas) ces coj mu tua tseev lawm xwb

- Tu npuas tsa nees (Coj lo ua zaub noj) ...lo muab ua ca?

Qhia Kom Paub:

    - Thaum ub tej laus muab coj mus dai pem hauv plag, tho qhov tsev, muab ob tug pas tiag nees ntawv ntxig ib tog mus rau nraum qaum tsev , muab daim nyias lo khi ob tog pa  tiag nees hauv tsev, ho tog nraum zoov muab ob tus ncej txho rau, muab txoj nyias ntawv khi rau saum cov qhab tsev.

     - Tab sis txheej tshiab no peb muaj vaj tsev zoo lawm peb tsua muab tso ua piv txwv lawm xwb (Cia lis muab ab tsis lo teem ces tso tu nees rau, muab daim nyias lo vas rau ua kev ua cais lawm xwb, yog hos tsi siv tu tiag nees (Tsi npaj lo tau), tsi siv daim nyias (txoj hlua) lawm lo yeej tsis ua ca (Yog muaj lub hleb thiab teem lawm), vim twb muab ab tsi coj lo tiag tu nees ces tau lawm, yog hos muaj lub hleb rau tu neeg lawm es txua tus nee me me coj lo ua piv txwv xwb ces cia li muab tso rau ntawm ib sab lub hleb xwb lo tau tsis txhaum ab tsis.

      - Muaj tej tsob hmoob ua yog Nees Dhau: Los Rooj Txuas - Taws Rooj Tag (lwm yam ces ua ib yam xwb.

3.8 Kev Ntawg Tshai, Su, Hmo

     Kaj ntug, tav su, tsau ntuj yuav tau ntawg tshai, Su, Hmo rau tu tuag noj, kev ntawg yuav ua li no:

  - Hli cawv rau hauv lub khob (tuav lub khob ntawm tes), ce laig tia:

=> Niam nob ... (Tuav tu tuag npe) Yuav tuav 3 txog cawv rau koj haus tso es yuav rau ib pluag "tshais" rau koj noj ce koj txai koj thiaj tau no ta..,

  - Ce muab tu txhib ntawg tso plhuav rau hauv daim txiag yog ib sab khwb ib sab ntxeev ce txais lawm ho tsis li ntawv ce ntau dua, (yog lees lawm)

  - Tuav lub khob yom rau tu tuag hai li no:

=> Ploj ces  txij koj leeg ploj tuag ces txij koj leeg tuag, noj ces txij koj leeg noj hau txij koj leeg haus; noj tsis taus tsis pub dab tu caj noj, haus tsis tau tsis pub dab tu ces haus; noj tsis tau hliv nruab taub hau tsis tag hliv nruab rag; noj tsis tau ua tiag pug ;haus tsis tau ua tiag nqa; yuav coj mus pub pog pub yawg noj; pub pog pub yawg haus; yuav mus dia pog dia yawg tw ris tw tso lawm ntuj txiag teb tsaus; ntuj nag teb nqhuab ; neej tshiab neej lig sawv muab noj muab haus nob ta..." 

Qhia Kom Paub:

     Kev ntawg Tshai, Su, Hmo rau tu tuag noj no ntawg ua ntej tag mas tshuab qeej rau lo tau, tshuab qeej ua ntej tag mam ntawg rau lo tau (Cias lis ntawg rau xwb tsi tshuab zaj qeej rau lo yeej tau tsi txhaum ab tsis).

3.9 Txhij Ncig / Cob Hauj Lwm Rau Ib Tsoom Thawj Lwm Tub Ncig (Ua Ntev - Ua Txhij)

Txij ncig kom ib tsoom tub ncig, tub dej, tub qa, tub num, tes num nyias paub nyias li ntiag tug nyob hauv lub ntees tuag.

Thawj Xyom Cuab li hauj lwm: Thaum thov tau cov tub ncig, tub qa tub num tuaj txhij tag, tus thawj xyom cuab yuav tau npaj ib rawg ntxuag rau saum rooj (Yog tsis muaj ntxuag cia li siv cawv xwb lo tau) yog npaj tsi yeej yuav qhaub noom me ntsis tso rau xwb lo kuj tau ib yam, rub lawv lo zaum ce mam li thov dag thov zog (lo yog ua lawv tsaug ua lawv tuaj).

Kev Rub Neeg Zaum Rooj:

- Pib tog txua lo mu rau tom tag (Thawj tug yog txiv taws kev zaum puab qhov rooj txua, Cuab tsav, ...)

- Rub ib tug lo zaum sawv cev kwv tij neej tsa (Ua ntsej ua muag, tu no yog pov thawj ntawm kev tsib tham)

- Thaum sawv daws zaum txij lawm ob tug sawv cev xyom cuab (Thawj Xyom Cuab) mam lo zaum sab nrav, teev cawv ib leeg ib khob (yog npaj tau ntxuag muab diav rau, npaj tsi tau ce siv cawv xwb lo tau lawm).

- Coj sawv daws kab cawv ib lwm mam pib tham, pib ntawm txiv taws kev, Cuab tsav ,... 

- Cov lus hais mus li hauv qab no:

=> Lus sam tham li no rau koj txiv taw kev , koj txiv cuab tsav, neb ob tug kav xwm, neb ob tus txiv qeej,neb ob tus txiv txiag,neb ob tus tub ua zaub, neb ob tus tub txiav taws thiab neb ob tus niam ua mov nyob li hnub no peb pog…, yawg ….. los yog niam, txiv, tub nyab paus, peb hais kiag lub npe…Txawj mob tsis txawj nquag, txawj laus tsis txawj hluas, ntuj niam tsi nqu te ntuj txiv ho nqus taw, sab tes thiaj npuaj tsis nrov sab taw thiaj sawv tsis ntseg, pw ko tuaj saum la, xyab nriav tuaj saum cwj. Lub zej zog txawm dav los tub txib txawm nqaim peb tsis pom qab vam khom leej twg peb thiaj vam khom tau:

       - Koj txiv taw kev, 

       - Koj txiv cuab tsav, 

       - Neb ob tus kav xwm,

       - Neb ob tus txiv qeej, 

       - Neb ob tus txiv txiag, 

       - Neb ob tus tub ua zaub, 

       - Neb ob tus tub txiav taw 

       - Neb ob tus niam ua mov,  

       - Thiab nej kev neej kev tsav toj txhais pem toj nram hav (Seb zaum tsawg leej hai kom tag).

       - Yuav vam nej sawv daws tso qav tso num cia, ncua qoob ncua loo tseg, yuav vam nej lub caij lub nyoog, lub dag lub zog, lub laj lim tswv yim tuaj pab peb tsev xyom cuab nta dab nta qhua,  kom ntseg li hlo puab tam ncej txawb.

       - Tseem kev tseem cais ces saum rooj muaj zoo kab phaj tus ntxuag rau nej khaw, muaj zoo pib deg pib caw rau nej tsaws peb mam los hais nej ib los lau. Tiam sis peb tsev xyom cuab ua lub neej tsis xws luag saum rooj tsis muaj zoo kab phaj tus ntxuag rau nej khaw, tsis muaj zoo pib deg pib caw rau nej tsaws los thov nej zam lub txheej rau peb tsev xyom cuab thiab. nej yeej meem pab peb tsev xyom cuab, nej tus txiaj tsha peb yuav ua tus nqa, nej tus txiaj ntsim peb yuav ua tus ri lau.

     Thaum hais li no tag yog muaj cov hlua sawv nram qab paub tab ces cia lawv hai thiab pes (Yog tsis muaj ces ob tug thawj xyom cuab hais ib tug zuj zu):

     1. Koj txiv taw kev, yeeb vim peb niam/txiv …. Txawj mob tsis txawj nquag, txawj laus tsis txawj hluas, ntuj niam tsi nqu te ntuj txiv ho nqus taw, sab tes thiaj npuaj tsis nrov sab taw thiaj sawv tsis ntseg, pw ko tuaj saum la, xyab nriav tuaj saum cwj. Lub zej zog txawm dav los tub txib txawm nqaim peb tsis pom qab vam khom leej twg peb thiaj vam khom tau koj txiv taw kev, yuav vam koj tso qav tso num cia, ncua qoob ncua loo tseg, yuav vam koj tuaj pab taw peb niam/txiv kab qhia pen txiv /niam kev rov mus cuag poj cuag yawm lawm puag ntuj qub qab teb qub lw. Tseem kev tseem cais ces saum rooj muaj zoo kab phaj tus ntxuag rau nej khaw, muaj zoo pib deg pib caw rau nej tsaws peb mam los hais nej ib los lau. Tiam sis peb tsev xyom cuab ua lub neej tsis xws luag, saum rooj tsis muaj zoo kab phaj tus ntxuag rau koj khaw, tsis muaj zoo pib deg pib caw rau koj tsaws, tsuas yog ib lo lus qhuav los hais koj xwb los thov koj ua lub siab ntuj ntev pab peb tsev xyom cuab nta dab nta qhua, kom dab tag qhua ntxee no laud. Thov saum koj txiv taw kev ov ces pe 2 pes.

Lwm tus lo hais ib yam xwb tsua pauv nws txoj hauj lwm xws li:

     2. Txiv cuab tsav pauv tias: yuav vam koj tuaj tuav diav coj peb niam/ txiv noj, pub peb niam/txiv haus, tuaj pab pauj kev neej kev tsav.

     3. Kav xwm: yuav vam neb lub dag lub zog, laj lim tswv yim tuaj pab peb nthe noj nthe haus, tuaj nrog peb tsev xyom cuab ntoj dab tus qhua, peb xyom cuab tus plaub xo ncej ntug ntxhov lis niab los yuav vam neb tuaj pab peb leg kom tiav, peb tus plaub xo ncej ntug ntxhov lis tsawv los yuav vam neb tuaj pab peb leg kom ntxaws.

    4. Txiv qeej: yuav vam neb tuaj tshuab peb caug peb zag qeej, ntau peb caug peb zag nruas xa peb niam/ txiv mus cuag poj cuag yawm, yuav vam neb tus txuj tus ci, tuaj ua pag ua xau rau peb niam / txiv lub ntees.

    5. Txiv txua txiag: yuav vam neb tuaj pab tsim peb niam/ txiv lub vaj txua peb niam/ txiv lub tsev, peb yuav ntiab neb mus tsim nws vaj txua nws tsev rau nruab zoov ntsuab tsuag mus ua dab ua tsov luag. (qhov no yog siv hais yuav mus ua tom hav zoov yog yeej npaj tau ua ntej es ua ntawm tsev xwb ces tsis hais)

    6. Tshwj kab (tub ua zaub): yuav vam neb lub dag lub zog, tuaj pab ua noj ua hau, tuaj khwv kub teg kub taw.

   7. Tub txiav taws: yuav vam neb lub dag lub zos mus txiav taw rau nruab zoov nruab tsuag, mus ua dab ua tsov luag

   8. Niam ua mov: yuav vam neb lub dag lub zog tuaj pab ua noj ua haus, tuaj khwv kub teg kub taw

   9. Niam diaj zeb tuav co, nqa dej; yuav vam nej lub dag lub zog tuaj pab peb diaj zeb tuav co, nqa dej, khwv kub teg kub taw.

   10. Nej kev neej kev tsav, laj lig tim fab pem toj nram hav……: yuav vam nej pab peb zov hnub, zov hmo, tuaj nrog peb tsev xyom cuab ntoj dab tus qhua, tiv qauv lwj qauv tsw.

Thov tsawg leej lo hais kom thoob xwb

    - Thaum hais cov txheej lus tiav lawm ces ob tug thawj xyom cuab coj cov thawj lwm tub ncig kab cov cawv, ces ob tug thawj xyom cuab mam lo hai tia:

=>  Lus sam khuj rau nej cov thawj lwm tub ncig sawv daws ua siab ntev tos, wb muaj lus yuav nrog kav xwm tham me ntsis ua ntej tso, muaj dab tsis los wb yuav tso rau kav xwm tham rau nej sawv daws.

    - Thaum khuj no tas koj mam teev cawv rau kav xwm ib leeg ob khob, Coj kav xwm cub cawv ib lwm tas ce hai li no:

=>  1.     lus sam mas hais li no rau neb ob tus kav xwm…., yeeb vim peb tsev xyom cuab txoj mhoov tsis sawm tswv, peb niam /txiv txawj mob tsis txawj nquag, txawj laus tsis txawj hluas, ntuj niam tsi nqus tes ntuj txiv ho nqus taw, sab tes thiaj npuaj tsis nrov sab taw thiaj sawv tsis ntseg, pw ko tuaj saum la, xyab nriav tuaj saum cwj. Lub zej zog txawm dav los tub txib txawm nqaim peb tsis pom qab muab zog laud, vim peb qav peb num ntau peb leg tsis tau, peb thiaj li vam khom nej cov thawj lwm tub ncig tuaj pab peb leg, los ua li hais lub zej zog txawm dav los tub txib txawm nqaim ces peb kuj thov tsis tau raws siab xav. mas yuav muab cov thawj lwm tub ncig no cob rau neb ob tug kav xwm, yog tias pab pawg twg ho tsis txaus no los peb mam ho fab peem tom qab, hmo no ces cov thawj lwm peb thov muaj li no.ces koj taw cov thawj lwm tub ncig qhia rau nkawv.

=> 2.     Neb ob tus kav xwm pab tshaj rau cov thawj lwm tub ncig sawv daws, peb xyom cuab muaj poj lag tub yau tus txawj hais lus los kuj muaj, tus tsis txawj los kuj muaj, yog poj lag tub yaus tus twg ho hais lus siab rau ib tsoom thawj lwm tub ncig leej twg los kom txhob rawm maj tso qav tso num tseg, tham rau neb ob tug kav xwm los yog wb ob tug thawj xyom cuab tsim nyog tso txoj hau lwm tseg lo mam tso, yog tsis tsim nyog tso los thov pab peb nta dab nta qhua kom kawg nawb.

=> 3.     Tham rau neb ob tug kav xwm li no nawb : hnub no peb niam/txiv lub ntee no peb ua dawb ua zoo ua kaj ua huv yog li no neb ob tug kav xwm pab tshaj rau kwv tij neej tsa sawv daws yog leej twg muaj nyiaj muaj kub, muaj tooj muaj nplhaib muaj khoom tseem ceeb yog hos ceev tsis tau no los muab los rau neb ob tug kav xwm los yog wb ob tus tawj xyom cuab pab ceev. Dhau lub ntee no lawm peb mam muab rau nws yog leeg muaj hos tsis muab rau peb ceev. Nws ho ceev tsis tau ua poob hauv no lawm los tej zaum peb yuav tsis nrog lav paub no nawb.

=> 4.     Neb pab tshaj rau kwv tij neej tsa yog leej twg muaj plaub muaj ntug, muaj xaiv muaj lus, kom txhob tuaj hais rau hauv peb lub ntee hauv no. yog leej twg ho tuaj hais rau hauv no tej zaum peb yuav muab cab te rau sab nrauv los txhob tu siab no nawb.

=> 5.     Neb pab tsaj rau kwv tij neej tsa sawv daws tuaj hauv peb lub ntees no, leej twg haus dej haus cawv kom nco dej nco cawv yog leej twg haus dej tsis nco dej, haus cawv tsis nco cawv, sib nrig sib ntaus, sib cav sib ceg, tej zaum peb muab rub tes tawm los kom txhob tu siab nawb.

=> 6.     Hais txog ntawm lub ntee ua loj los yau, qhua txws rau hnub twg, tsiaj txhu yuav siv npaum cas, ib hnub yuav tua pes tsawg tus tsiaj los yeej yuav tau tham qhias rau kav xwm.

=> 7.     Hais txog ntawm tej khoom siv nyob rau cov thawj lwm tub ncig thxua pab pawg qhov twg tsis muaj no ho lo hais peb xyom cuab mam ua tus nrhiav rau. Wb lus tsua muaj li no xwb. Wb muab cob rau neb ob tug kav xwm yuav vam neb pab coj pab tuav kom lub ntee nodab tag qhua ntxhee no laud.

      Tag li no ces coj lawv kab cawv, ces tso rau ob tus kav xwm los cob qav num rau cov thawj lwm tub ncig thiab los tshaj lus rau kev neej kev tsav sawv daws tag, yus mam los hau tus cawv txij ncig ces kawg li no (Dhau ntawv mus yog tsis tau taw kev ces tu txiv taw kev mus taw kev xwb, yog taws ua ntej lawm mam tsa lub rooj txij ncig ce tag lawm).

3.9 Txhij Ncig / Cob Hauj Lwm Rau Ib Tsoom Thawj Lwm Tub Ncig (Ua Luv - Yooj Yim)

Txhij ncig kom ib tsoom tub ncig, tub dej, tub qa, tub num, tes num nyias paub nyias li ntiag tug nyob hauv lub ntees tuag.

Thawj xyom cuab li hauj lwm: Thaum thov tau cov tub ncig, tub qa tub num tuaj txhij tag, tus thawj xyom cuab yuav tau npaj ib rawg ntxuag rau saum rooj (Tsi muaj siv cawv lo tau) rub lawv lo zaum ce mam li thov dag thov zog (rub zaum qhov twg lo tau kom nco xwb) yog tsi noc ce yuav tau rub zaum raws ib txheej zuj zus lo mus.

Cov Lus Thov Hais Li Hauv Qab No:

      => “Lus sam ma tham li no rau ..!! Koj txiv qhuab ke, Vim peb xyom cuab, tsev ploj tsev tuag- tsev pua tsev ntsoog tsis pom qab thov zog, tsuas zeem tau thov koj lub dag-lub zog qhuav tuaj pab peb xyob cuab nta dab-nta qhuas (xa peb … “saib tu tuag yog leej twg hai raws nw lub npes xwb”) mu cuag poj cuag yawm,  koj tso qav tso mum tseg, yog peb xyom cuab txawj ua lub neej xws luag ces yuav kab phaj rawg ntxuag-pib deg-pib cawv rau saum rooj rau koj khaws, Vim peb xyom cuab tsis txhawj ua lub neej, ces tsis muaj kab phaj tu ntxuagpib deg pib cawv lo koj txhob xav li cas, tsua yog thov koj lub zog qhuav xwb no mog” Ces pes kaig ob pes.

(Thov ib zaug tag nrho xwb lo tau, hai ib tug zuj zu lo tau, thaum thov tag lawm ce tu thawj xyob cuab mam pe cov tub ncig ntawv ib tug zujzus, Thov tu twg lo hai ib yam xwb)

Thaum ua tsaug rau txhua tu tag lawm, tu thawj xyom cuab rov qab pe cov thawj lwm tub ncig ib pes, Hai tias:

=> “Hia rau nej ib tsoom tub ncig suav daws hai tia - yog tej pojniam tub se los sis kwv tij neej tsa ho tsi txawj hai lus, lam tau lam hais lus siab nej lawm lo thov nej txhob maj tu siab, nej hais rau peb xyom cuab paub tso txaus tu siab nej mam li tu-txau tso tseg nej mam li tso tseg no mog - khwv saum nej suav daws auv..!!!”.

Kab cawv ces tiav  thawj xyom cuab li hauj lwm.

Kav xwm li hauj lwm: 

      Thaum thawj xyom cuab ua tsaug tiav ce yog kav xwm li hauj lwm tuaj lawm, thaum no ce ob tug kav xwm mam li sawv tsees los tuaj sab nrav coj cov xyom cuab rov qab pe tsoom tub ncig ib pes ntxiv, Hai tias:

=>“Hai rau nej sauv daws, vim luag xyom cuab tsev ploj-tsev tuag tsi pom qab thov zog thiaj thov nej suav daws lub dag-lub zog tuaj legqav-leg num, nej tso liaj-tso teb tseg, lo thov nej ua siab ntev pab, yog wb ob tug kav xwm tso tseg thaum twg nej mam li tso, yog wb tsi tau tso tseg thov nej txhob maj tso thiab wb txawm ho nthe hlob-nthe yau, nthe siab-nthe qis los thov nej ua siab ntev pab luag tsev xyob cuab no auv..!!!”  _ Ces pe kiag ob pes.

 IV. Kev Hu Hauv Qhuas

4.1 Tu Tuag Yog Tub Hlua, Ntxhai Hlua (Lo Sis Tsev Neeg Txom Nyem) 

Yog tias tus tuag yog tub hlua, ntxhai hlua xwb thiab yog tu tuag lub neej txom nyem ces tsi hu hauv qhuas li cia li ua yooj yim xwb:

-          Tsi hu huav qhuas

-          Tsis muaj lub rooj (Tsis hais xim)

-          Tsis muaj muam phauj txiv dab laug

-          Ua raw: ..... thiab... xwb ce tso tseg li no, ... thiab ... lo kuj hu tsi tas-tsi hu neeg txhij txhuas, tu twg yuav siv ces hu kiag tu ntawv xwb.

-          Cov zaj qeej lo kuj tshuab tsi ntau (tshuab cov tseem ceeb xwb):

* Zaj qeej tsa neees

* Zaj qeej cob ntawv

* Zaj qeej hlawv ntawv

* Zaj qeej tawm nras (Tawm hauv tsev mus) ?

4.2 Tu Tuag Yog Neeg Laus Muaj Tub Muaj Kiv

 Yog tu tuag yog neeg laus muaj tub muaj kiv ua neej xws luag no ces xyom cuab yuav sab laj saib:

-          Yuav hu pes tsawg hauv qhua

-          Yuav tua pes tsawg tu s tsiaj (Nyuj) raws li kev cais mas tsua tuas 2 tug xwb, Ib tug rau cuab tsav; ib tug rau muam phauj lo sis txiv dab laug

-          Tu tuag yog txiv no hu muam phauj tua nyuj, txiv dab laug nias tsum; tu tuag yog niam no hu txiv dag laug tua nyuj, muam phauj nias tsum.

A. Txheej Txeem Kev Mu Hus Hauv Qhua Loj (Hauv Qhua Txooj):

-          Nrhiav ob tug tub hu qhua

-          Yog tu tsiaj yuav tua ntawv yog nyuj ce ob tug tub hu qhua yuav tsum ntoo ib xib xub

-          Yog tu tsiaj yuav tua ntawv yog twm ce ob tug tub hu qhua yuav tsum ntoo ib re nplooj

A.1 Mus Hu Muam Phauj/Txiv Dab Laug Tuaj Tua Nyuj (Hauv Qhua Txooj):

Thaum ob tug tub hu qhua mu txog ntawm luag qhov rooj tag ces cia li txhos caug ntua sab qhov rooj nraud, ces ceeb toom luag hais tias:

=> “Thov ceeb toom rau ncej dab ncej qhua paub tias, tu (npe hu ua, hais kaig lub npe) nws ib nqaj tsis nto ntuj - ib ploog tsis nto ntsis lawm. Ce wb yuav tuaj fi lub moo rau koj ua muam phauj/txiv dag laug paub no auv. (Yog txawj zaj ce qhib suab hai zaj kaig, yog tsi txawj zaj ce ua nriav lus hais kiag xwb)”.

Cov nriav lus hais li no:

=> “Hai rau koj muam phauj/lo sis txiv dab laug (Seb tu mu hu ntawv muam phauj lo txiv dab laug) tia:

* xyoo no koj nyaj cawm txiv dab laug nws ib nqaj tsi nto ntuj - ib ploog tsis nto ntsis, nws ntsuj mam huab xyws qaij qaug yeev lo lawm yeeb tim nrag, ntuj cev qaug ua qauv lwj los rau nruab tag, zaum no yuav tuam vam-xov vam koj muam phauj mus qaij nws laus lub kaus tsuj dub rau nws laus coj mu lawm yeeb tim nrag.

* vim xyoo no nws ib nqaj tsi nto ntuj - ib ploog tsis nto ntsis, nws ntsuj mam huab xyws qaij qaug yeev lo lawm yeeb tim teb, ntuj cev qaug ua qauv lwj los rau nruab plag tsev, zaum no yuav tuam vam-xov vam koj muam phauj mus qaij nws laus lub kaus tsuj ci rau nws laus coj mu lawm yeeb tim teb.

* wb tuaj ces wb ntsua daj yog daj-wb taug nraim nws laus lus txheeb caj, twb tuaj ce wb ntsua tes yog tes-wb taug nraim nws laus tus xeeb ces.

* wb npluj tswg tsi tshais tswg-pov hneev tsi tshais xib, wb taws nkawj ces yog nkawj-wb taws daiv ces yog daiv no lauj!!

Thaum hai li no tag ces yog luag muaj lus tu siab ab tsi ces luag hais tuaj, txau thov lo yuav tau thov-txau kho lo yuav tau kho. Thaum laug lees tas lawd luag mam lo rho xub (yawm nplooj) ces ob tug tub hu mam li nkag mu hauv tsev tau.

Raws li keeb kwm tej lau ib txwm coj los (vim txoj kev deb thiab kev sib hlub) Thaum ob tug tu hu nkag tau mu hauv tsev lawm, mu sib nug sib tham raw kev noj qab nyob zoo, kev ntsau siab. thaum no tu muam phauj ntaus nyuj (lo yog tu txiv dab laug ntau nyuj) yuav tsum tua qaib pub nkawv noj thiab qhwv me ntsis nyiaj rau nkawv ces nkawd rov qab lo tsev xwb (hai txog nyiaj mas muab li cas lo tau, yog nyob sib ze xwb ce muab li 10,000 -20,000 xwb los tau (yog nyob deb muab li 50,000 - 100,000) faib rau ob leeg xwb.

A.2 Mus Hu Muam Phauj/Txiv Dab Laug Nias Tsum (Hauv Qhua Txooj):

Tsis ntoo ab tsi li, tsuas nqa ib hwj cawv mus txog tom luag tsev ces ce cawv rau luag haus, tsa ncauj hais tias:

=> “Hai rau koj muam phauj/lo sis txiv dab laug tia:

* xyoo no koj nyab/yawm yij (hai lub npe) ib nqaj tsi nto ntuj - ib ploog tsis nto ntsis, nws cev cwj yag txha qaij qaug yeev ua qauv lwj lo rau nruab tag, yuav tuam vam-xov vam koj muam phauj/txiv dab laug mus pab txheeb nws tus tsiaj ua luag tuag, tsoos ua luag lwj rau nws laus coj mu lawm yeeb tim nras.

Nws laus cev qhaij qaug yeev los rau nruab tsev, yuav tuam vam xov vam koj muam phauj/txiv dab laug mu pab txheeb nw laus tus tsiaj ua luag tuag, tsoo ua luag lwj rau nws lau coj mu lawm yeeb tim teb no lauj!! Koj muam phauj/txiv dab laug. Luag hai tias nws tsis muaj kaus dub, kaus ci rau koj qaij los koj txhob tu siab.

Thaum hai tas li no ce cia li rov qab lo xwb.

B. Txheej Txheem Kev Mus Hu Hauv Qhua Me (Hauv Qhua Tab):

Hauv qhua tab (xav qhua) yog cov hauv qhua me, Kev mu hu hauv qhua tab cia li hai neeg mu hus lo yog tso moos (hu xov tooj rau xwb lo yeej tau lawm).

Cov lu hai cia li hai tia:

=> “Hais rau koj, … Vauv, dablaug!! Paub tia (hai lub npes) tau tag sim neej lawm, yuav muab nws laus lub cev lo ua dab ua qhuas (hnub … yog hnub qhua txws, hnub … yog hnub sam sab) es tso lub moos rau koj kom koj tuaj ua … vauv, dab laug … hlub no mog”.

Thaum hai li no tag ce cia li rov qab lo xwb.

Qhia Kom Paub:

- Kev hu hauv qhua txheej tshiab no txhob hu ntau ntau lawm, yog tu tuag yog txiv neej ce hu kiag tu muam phauj ntau nyuj, hu txiv dab laug tuaj nias tsum lawm xwb. yog tu tuag yog poj niam ces hu kiag txiv dag laug tuaj ntau nyuj, muam phauj tuaj nais tsum lawm xwb.

- Lwm tus ces tsis tseem ceeb lawm hus ua xa qhua lawm xwb, yuav tuaj thiab tsis tuaj lo kav liam.

- Yog tu txiv neej tuag, es nws cov phauj ho puv 120 ua ntej tag lawm ces cias li ntau xov mu rau tej tub tej kiv kom ua xav qhuas tuaj hlub lawm xwb, tsis tas ua hauv qhua txooj lawm (Ces tsi muaj tu nyuj nram tswg), tua nyuj lo ua zaub noj lawm xwb, thaum tsis muaj nyuj tua lawm ces hu txiv dab laug ua xav qhua tuaj hlub lawm xwb thiab (ob tog thiaj tsis poob nyiaj poob txiaj thiaj yoj yim).

- Yog tu poj niam tuag, es nws cov dab laug ho puv 120 ua ntej tag lawm ces cias li ntau xov mu rau tej tub tej kiv kom ua xav qhuas tuaj hlub lawm xwb, tsis tas ua hauv qhua txooj lawm (Ces tsi muaj tu nyuj nram tswg), tua nyuj lo ua zaub noj lawm xwb, thaum tsis muaj nyuj tua lawm ces hu muam phauj  ua xav qhua tuaj hlub lawm xwb thiab (ob tog thiaj tsis poob nyiaj poob txiaj thiaj yoj yim).

V. Npaj Ua Hauv Qhua

5.1 Kev Ua Hauv Qhua Loj (Hauv Qhua Txooj):

Ntawm tus cuab tsav thiab tu muam phauj (Txiv dag laug) ntau nyuj mas yuav tau npaj li hauv qab no:

-          Ib tug me nyuam npua (Vom kom saiv)

-          Ib tug qaib (Vom kom saiv) thiab siab qaib

-          Ib ntshua ntawv-nrog 3 tug xyab

-          Peb hwj cawv - nrog me+ mov

-          Muab ib qho nyiaj kab tsem (muab li 5,000 – 10,000 Kip) muab li ca lo tau nyob ntawm muaj

-          Muab ib qho nyiaj tshav ntuj (muab li 10,000 – 20,000 Kip) muab li ca lo tau nyob ntawm muaj

-          Ib lub tsho tshaj sab (lo sis ib fab ntaub)

-          Thov ib tug ua hauj lwm pab (tus kig)

Thaum npaj tau li no lawm ces, saib seb luab teem hnub twg yog hnub qhua txws ces mam coj neeg nrog mu (tuaj). Peb hmoob laus hais tias yog “mus txws tuag no”.

5.2 Kev Ua Hauv Qhua Me (Hauv Qhua Tab-Xav Qhua):

Ntawm cov hauv qhua ua yog huav qhua me (hauv qhua tab) ce npaj li hauv qab no xwb:

-          Ib tug qaib (Vom kom saiv) thiab siab qaib

-          Ib ntshua ntawv-nrog 3 tug xyab

-          Ib hwj cawv - nrog me+ mov

-          Muab ib qho nyiaj kab tsem (muab li 5,000 – 10,000 Kip) muab li ca lo tau nyob ntawm muaj

-          Muab ib qho nyiaj tshav ntuj (muab li 10,000 – 20,000 Kip) muab li ca lo tau nyob ntawm muaj

Qhia Kom Paub:

- Kev hu hauv qhua yog luag tuaj hus yu mus ua hauv qhua txooj, txheej no yog txheej tshiab lawm, tseem muaj lus tsis sib nkag siab li cas lo zoo tshaj txhob muab lo hai lawm, cais li mus ua hauj lwm kom tiav xwb (txhob cia luag thov yu), yog koj xav tia tsim nyog yuav hais ces thov koj txhob hai tab sis koj mu ua yooj yim rau tsev xyom cuab xwb luag yuav nco koj tu tshav ntuj tshaj.

- Txheej tshiab no tsis muab nyiaj kab tsem lawm lo tau, vim tia "Nyiaj Kab Tsem" yog nyiaj muab ua nqis kev tuaj tshaj lub moos thiab tuaj hus rau Kav Xwm xwb, txheej tshiab no siv xov tooj hu xwb ces tsis muaj nyiaj kab tsem lawm lo tsis ua ca.

- Yog luag hos hus tsis txog yus es yu hos npaj ua ib hauv qhua mu hlub lo mu ncaj mu ncees xwb (Vim luag muaj neeg tuag luag nyuaj nyuaj siab) luag yuav tsis nco qab hu txhua txhua leej, Mu txog txhob cais luag lo thov yus muab nyiaj mu pab ncaj pab ncees xwb.

- Kev ua hauv qhua koj tsis tas npaj qaib lo tau, cia lis npaj ib qho mov ib lub qes lo yog npaj ib qhov nqais haus saiv saiv (Coj mu laig rau tu tuag xwb tau lawm) tsis tas koj yuav tsum npaj kom muaj xwb, ziag no nyob rau sab Mekas lawv twb tsis npaj qaib lawm.

###  Tiam Txiv Qeej

     Kev tiam txiv qeej mas yog ua ntej hmo yuav qhua txws (Ua ntej hmo tag kis kaj ntug hauv qhua tuaj). Yog ua neej xws luag hmo ntawv yuav tau npaj ib nyuag puas mov coj los tiam cov txiv qeej.

VI. Hnub Qhua Txw - Thaum Hauv Qhua Mu Txog - Tuaj Txog (Yuav Ua Ca?)

   6.1 Kev npaj ntawm kav xwm thiab thawj xyom cuab:

    - Npaj ib cov tub los xyom tos qhuas

    - Npaj ib cov tub lo txais kawm, txais pob tawb thiab ntawv hauv qhuas

    - Npaj ib co tub ua tsaug (thaum faib hauv qhua sus)

Peb hmoob txoj cais mas thaum cov hauv qhua tuaj txog tom tsev tuag mas “tshwj kab, kav xwm” yuav tsum mu to txais luag cov txhaim xws ua luag npaj tuaj ntawd coj mus khaws cia zoo (yog tia tshwj kab kav xwm tsis tos txais laug tej xyab-ntawv-pob tawb mas luag muaj cais hais) ces kav xwm thiab tsev xyom cuab tseem tau thov thiab.

Ib pliag zoj li 10 feeb qhua tu kig (lo yog tu tswv pob tawb) los muab kiag:

-          Hwj cawv-nrog qhov mov

-          Thiab siab qaib

-          Tus kig coj mu cob kiag rau tus cuab tsav

-          Cuab tsav mam coj mu qhia rau tu tuag (Laig dab)

-          Thaum cuab tsav laig tag tiav lawm, tus kig mam coj hwj cawv mu ces rau xyom cuab hau qhia tia yog muam phauj/txiv dab laug cawv laig dab no (Thaum no cov xyom cuab yuav tsum ua muam phauj/txiv dab laug tsaug raws li cov lus ua tsaug).

Qhia Kom Paub:

     Yog koj yog tu ua hauv qhua mu luag hos npaj tsi yeej hos txai tsis yeej yus tej xyab ntawv, thiab yus tej pob tawb lo yog luag tsam ncauj thov lawm ces thov koj ua yooj yim xwb, txhob ua plaub ua ntug rau luag (vim luag tsev xyom cuab muaj kev nyuaj siab ntau txau lawm).

6.2 Txheeb Tsoo

      Yog tus tuag yog ib tug laus neeg (Muaj neej lawm) thawj xyom cuab thiab kav xwm yuav tau nrog tsev xyom cuab tham (lub rooj ci qo) tham txog:

     - Faib tsiaj 

     - Faib tsoo tsho - tshoo laus

     - Faib khooms rau tus tuag

     - Lo tham txog tej lus xaiv ntawm txiv cuab tsav, Muam phauj, txiv dab laug (Yuav lo daws tej lus cov nyom) ...?

6.3 Kev Faib Hauv Qhua Su

Thaum cov hauv qhua tuaj tas lawm mas mam pib faib hauv qhua su, yuav npaj li hai mu no:

-          Rub ib lub rooj:

      1. muab cuab tsav teeb ua ntej; 

      2. Muam phauj/txiv dab laug ntaus nyuj teeb lawv qab; 

     3. Muam phauj/txiv dab laug nias tsum npuab tus ntaus nyuj, yog muaj lwm tu ntau nyuj ma teeb sib txua lo mus) cov no peb hmoob hu ua hauv qhua txooj.

      4. Dua li ce yog cov hauv qhua tab lawm xwb cias li teeb kom hu tau sawv daws nyias lo txheeb nyias lub kawm tau xwb (cov hauv qhua tab ce tu twg ua ntej ua qab lo tau).

-          Hais txog ntawm tu me nyuam npuas mas muab txiav txij ntawm hauv siab ua ob ya – muab phua yav taub haus ua ob sab, muab ib sab rov rau muam phauj nrog ib thooj nqaij tu moo, hos ib sab nrog taub hau muab rau xyom cuab, muab cov tav txhoov ua tej ywb yav faib rau txiv qeej, kav xwm, tshwj kab, niam ua mov.

-          Hos cov qaib lo faib ib yam xwb (Phuas ua 2 sab muab sab nrog lub tau haus rau tu ua hauv qhua tuaj ntawv, nrog ib qho nqaij tu moo)

-          Thaum faib hauv qhua su tas lawm mas kav xwm yuav cob kawm (Pob tawb) rau cov hauv qhua ua muaj nyuj tua qhia hais tias “Koj muaj rooj zaum od” no, nco ntsoov mog.

Qhia Kom Paub :

- Txheej tshiab no nyob sab Mekas teb yog tu twg tsis muaj qaib (Siab qaib) tuaj laig ces twb tsis muaj faib hauv qhua su, yog tsis muaj faib hauv qhua sus ces twb tsis muaj nqaij tus moos (qhov no yog sawv das muaj lub zeem muag xav kho kev ntseeg tiag tiag) kom sawv daws txo lub hwj chim. cov xav qhua tuaj tsis tua qaib tsi npaj qaib lo tau (vim yog tsis npaj ces kuj tsis ua kev txob kev txhawj rua tu npaj tuaj thiab).

- Kav Xwm mas luag yeej yuav muab nqaij tus moo txawm yu yuav thiab tsi yuav lo luag yeej yuav maub, yog muaj faib hauv qhua sus lawm (Vim yog luag li hauj lwm).

VII. Kev Ua Tsaug

7.1 Ua Tsaug Thaum Kev Neej-Kev Tsav Tuaj Pab

Cov lu ua tsaug thaum kev neej kev tsam tuaj pab dej-cawv, Txhuv-mov thiab nyiaj txiag muaj li hauv qab no:

A. Hmoob Laus Hai Li No:

=> “Tsaug mog..!! Vim peb xyom cuab, tsev ploj-tsev tuag- tsev pua-tsev ntsoog, koj tsis cias li koj xav kwv-xav tij, xav neej sav tsav, koj tshav ntuj nto-nyiaj txiag nto tuaj pab peb xyom cuab nta dab-nta qhua ntseg log puav tam ncej txawb, hnub qab nram ntsis yog peb xyom cuab txawj ua lub neej xws luag ces yuav nco tau koj tu txiaj-tu ntsig, yog peb xyom cuab tsis txawj ua lub neej tsis xws luag ces cuag li yuav nrauj koj tes txiaj ntsim ua tshuav ua these yaj xwb no lauj ..!!!

Tus Teb Hmoob Laus Teb Tias:

=> “Tsaug ab tsi..!! Vim nej tsev xyom cuab nej qaij ib nkog-nchuav ib saws. Kuv yog kev neej, kev tsav, kev zej-kev zos. Yog kuv txawj ua lub neej xws luag ces kuv yuav cab nyog yaj-cab nyog ncos tuaj pab nej nta dab-nta qhua. Vim kuv ua lub neej tsis xws luag, tam li ib khob cawv dej txiag twb tuaj tauv tsis tau nej xyom cuab lub kua muag txhob ua tsaug nkim los tsaug xwb (Hai li no tag ces tsas tu ua yu tsaug sawv kom txhob pes xwb).

 

B. Txheej Niam No Nyiam Hais Li No:

=> “Tsaug mog..!! Vim peb xyom cuab, tsev ploj-tsev tuag- tsev pua-tsev ntsoog, koj tsis cias li koj xav kwv-xav tij, xav neej sav tsav, koj tshav ntuj nto-nyiaj txiag nto tuaj pab peb xyom cuab nta dab-nta qhua ntseg log puav tam ncej txawb, hnub qab nram ntsis yog peb xyom cuab txawj ua lub neej xws luag ces yuav pauj koj tu txiaj-tu ntsig, yog peb xyom cuab tsis txawj ua lub neej tsis xws luag lo yuav nco koj tu txiaj tu ntsig no mog ..!!!

Thaum hai tiag li no tag ce pes kiag xwb

Kev ua tsaug ces yeej ua ib yam xwb tsu yog tia hloov cov lu hai seb lawv pab ab tsi xwb:

-          Yog luag nqa nyiaj tuaj pab ce hai tia = Nyiaj txiag nto

-          Yog luag nqa dej cawv tuaj pab ce hai tia = Dej cawv nto

-          Yog luag cab tsiaj tuaj pab ce hai tia = Qaij hno nto

-          Yog luag nqaTxhuv thiab nplej tuaj pab ce hai tia = Qaij hno nto

Tus Teb Txheej Niam No Teb Tias:

=> “Tsaug ab tsi..!! Vim nej tsev xyom cuab tsev ploj-tsev tuag- tsev pua-tsev ntsoog, Kuv yog kev neej, kev tsav, kev zej-kev zos. Yog kuv txawj ua lub neej xws luag ces kuv yuav cab yag - cab nco tuaj pab nej nta dab-nta qhua. Vim kuv ua lub neej tsis xws luag, tam li ib khob cawv dej txiag twb tuaj tauv tsis tau nej xyom cuab lub kua muag txhob ua tsaug nkim los tsaug xwb (Hai li no tag ces tsas tu ua yu tsaug sawv kom txhob pes xwb).

7.2 Ua Tsaug Faib Hauv Qhua Su

Cov lu ua tsaug thaum faib hauv qhua su muaj li hauv qab no:

=> “Tsaug mog..!! (Tuav lub npe) koj tsis cias li koj xav kwv-xav tij, xav neej sav tsav, xav ntsuab xav ze, koj cab yag cab ncos toom txheej toom lis, nyiaj txiag nto, dej cawv nto, nqaij ntsiab hnos tuaj pab peb xyom cuab nta dab nta qhua ntseg log puav tam ncej txawb. Hnub qab nram ntsis peb xyom cuab txawj ua lub neej xws luag ces yuav nco koj tu tshav ntuj, yog peb xyom cuab tsis txawj ua lub neej tsi xws luag ces cuag li yuav nrauj koj tes txiaj ntsim ua tshawv ua thee yaj xwb mog.

7.3 Tiam Txiv Coj Xai

     Yog lub ntees tsis muaj rooj hais xim ces tsis muaj lub rooj tiam txiv coj xai (vim tsis muaj txiv coj xai).

     Yog cov lub ntees muaj rooj hais xim peb yuav npaj ib pluas mov los tiam txiv coj xai thiab kev neej kev tsav, nrog rau cov thawj lwm tub ncig. pluas mov no peb yuav tiam lub caij 4-5 teev (moos yuav tsau ntuj hnub qhua txw) ntawv mas thiaj li.

VIII. Lub Rooj Hais Xim

8.1 Saum Lub Rooj Hais Xim (Muaj Ab Tsi?)

Ntawm lub rooj hais xim mas muaj li nram no:

-          Ib lub rooj, ib tug me nyuam npua

-          Ib ntig txhuv, ib lub qe, ib rab taus, ib txog hlua

-          3-4 phaj ntxuag, dej, cawv, luam yeeb.

Teeb rau saum lub rooj hai xim (rooj txiv xaiv)

8.2 Cov Neeg Zaum Sawm Rooj

Cov neeg zaum rooj muaj li no:

1. Txiv coj xai zau puab tog taub hau tu tug 

2. Txiv cuab tsav zau puab coj xai

3. Muam phauj/txiv dab laug ntaus nyuj npuab cuab tsav

4. Muam phauj/txiv dab laug nias tsum npuab muam phauj/txiv dag laug

5. Cua nyab cua nthxais. Ob tus no yog muaj tsiaj tua thiaj rub lo (Ntau lub ntees tsis muaj ob tug no lawm)

6. Kav xwm. (yog kav xwm sawv qab ntee no ces nyob saum txiv coj xai lawm, Tus nov tsis rub lawm, vim kav xwm thiab txiv coj xai yog ib tug xwb)

7.  Txiv xeev txwj laug

8. Txiv txiag (Yog muaj)

9. Txiv qeej

10. Txiv thwv (Tshwj kab) 

Cov tsi zaum rooj muaj: niam ua mov, siv thawj, tshaj thawj, ywb kab, niam duj zeb tuav cos.

Qhia Kom Paub: 

    - Kev rub neeg zaum rooj no ib rab teb ib tsas txuj rub sib txawv, qhov no tsis txaum ab tsis rub li ca lo tau (rub kiag cov tseem ceeb xwb lo haj yam zoo), rub txhua tu lo tau

   - Muaj tej thaj chaw lawv rub txhua tus ces thaum lo tham txog ntawm (Txiv taws kev, Niam ua mov, Siv thawj, tshaj thawj, ywb kab, niam duj zeb tuav cos , ..Ces hai tia: 

=> Lus sam tham li no rau koj / nej ((Txiv taws kev, Niam ua mov, Siv thawj, tshaj thawj, ywb kab, niam duj zeb tuav cos) .. Tseem kev tseem cais peb xyom cuab muaj lub rooj los rau neb zaum thiaj tsim nyog, tab sis poj ua cia yawm ua tseg ho tsis muaj, nej pab peb zoo npaum li cas lo peb niam/txiv yuav foom koob tso hmov rau nej kom zoo npaum li ntawv thiab , nej tus txiaj ntsig peb xyom cuab ua tus ris no lau.

      - Vim twb muaj ib lo lus tia "tab sis poj ua cia yawm ua tseg ho tsis muaj" ces txhob rub (Txiv taws kev, Niam ua mov, Siv thawj, tshaj thawj, ywb kab, niam duj zeb tuav cos) rau saum lub rooj mas thiaj yog.

8.3 Tus Kev Cai Txheeb

Cov neeg zaum rooj muaj cais txheeb raws nyias ntiag tug raws li hauv qab no:

-          Tu cuab tsav muaj cais txheeb tsoos, tsho, nyiaj txiag, tsiaj txhu rau tu niam kom ntau tshaj tus txiv.

-          Tus muam phauj muaj cai txheeb ib yam li tus caub tsav.

-          Tus txiv dab laug muaj cai txheeb tsoo tsho, nyiaj txiag kom ntau rau tu txiv.

-          Tus xeev txwj laug muaj cai txheeb nuj txheeb nqi thiab pab faib lub cuab tam kom sib npaug zos.

-          Tus txiv txiag muaj cai thov ib fab ntaub coj mus pua lub hleb rau tu tuag pw.

-          Tus txiv qeej muaj cai thov ib pluaj ntaub liab khi nws rab qeej thiab lub nruas

-          Tus tshwj kab muaj cai thov zeb ho, thov ntsev, thov ib hwj cawv, thov riam.

Kev txheeb no vim peb hmoob thaum qua tus ntxhai peb muaj ib coj nyiaj ncauj tsiag (Nyiaj ncauj tsiag yog choj nyiaj kom lwm hnub tag sim neej es tua ib tug nyuj rau) vim li no mas muam phauj thiab txiv dab laug thiaj hlob lub caij ntawv.

8.4 Kev Cai Txiav Tus Npua Nias Tsum

Ntawm tu npua nias tsum muab txiav ua peb ya:

1.     Txiav txij ntawm lub tsos yav taub hau pua ua ob sab sib luag zos rau ob tug hais txiv xaiv.

2.     Txiav txij ntawm ntha ob ceg rau ob tug kav xwm (yog tias kav xwm tsis nyob zov hmo ces muab rau ob tug txiv xaiv tib si)

3.     Ntawm cov tav ntxhib ces muab txiav faib rau cov zaum rooj ib leeg ib nyuag qhov me+ ua ntsej muag luag xwb.

8.5 Xem Lub Mos Xyom

Thaum tus txiv xaiv foom kom tas (Hais txiv xaiv tas), nws yuav coj cov xyom cuab ua ib tsoom tub ncig, kev neej-kev tsav tsaug. Kev ua tsaug no peb hmoob laus hais tias “Xem lub mos xyom” no.

Cov lus ua tsaug hais mus li no:

=> “Khwv saum koj txiv cuab tsav, muam phauj txiv dab laug, kev neej kev tsav, toj txhaij ub txoj txhaij no, vim xyom cuab tsev ploj-tsev tuag, tsev puas-tsev ntsoog, nej xav kwv xav tij-xav neej xav tsav, nej cab yag, cab ncos toom txheej toom lis tuaj pab xyom cuab nta dab-nta qhua ntseg log puav tam ncej txawb.

Tsi tas li nej tseem tuaj nrog xyom cuab zov hnub thawm hmo-hmo thawm hnub, nyob tiv qaug lwj qauv tsw, nyiaj tshaib yoo nqhis-nyiaj no nkaug ntsim, tuaj nyob lub dag lub zog ua tshuav ua thee yaj tam li nyuj nees nuam peem xeeb tshaj, yog tsev xyom cuab txawj ua lub neej xws laug ces yuav muaj kab phaj rawg ntxuag tug cawv xaws rau saum rooj ua nej ib los tsaug.

Vim xyom cuab tsis txawj ua lub neej thiaj tsis muaj kab phaj tus ntxuag cawv xaws ua tsis taus nej ib los tsaug, tsuas yog nrog nej xem lub mos xyom qhuav xwb no auv..!!” (Ce ib txaum yim xwb tsis tau pe).

Ce mam li rov hai li hauv qab no ntxiv:

=> “Luag hais tias, nram qab-nram ntsis, nram qab-nram qawm nej muaj tub yuav nyab-muaj ntxhais yuav qua, yog nej yeej cuam tsis txog xyom cuab tej kwv tij txiv tub lo tseg, yog nej yeej cuam txog xyom cuab tej kwv tij txiv tub, xyom cuab ua lub neej xws laug yuav tuaj peb nej xiab ib tug ceg rooj, txawm hai tia pab tsi taus nej xaib ib tug ceg rooj los yuav tuaj pab nej tshaj lub phaj. Yog xyom cuam ua lub neej tsis xws luag los yuav tuaj pab nej leg qav-leg num, txoj hauj lwm nyhav lo yauv tsis xyeej-txoj hauj lwm sib los yuav tsis tib yuav pab cheb pluas plav no auv !! ces pe tus twg (yog hos ua tsaug rau txuas tu neeg ce ua tug twg lo hais ib yam xwb, yog hos hai ib teg tag nrhos ce hais ib zaug xwb).

Qhia Kom Paub: 

    - Niam no muaj muaj ntau lub ntee tsis “Xem lub mos xyom” lawm, muaj tsawg tsawg lub ntees thiaj pom ua lawm xwb.

    - Muaj ntau lub ntees tuag nyob sab teb chaws Mekas lawv kuj tso lub rooj hai xim tseg lawm, kev tso lub rooj hais xim tseg ua rau siv sij hawm ua lub ntees lub tuaj, txuag tau kev siv nyiaj siv txiaj ntau tuaj, yog cov tub kis nyiam mam ua lo tau, yog tu tuag hai tseg tsi ua thiab yog cov tub kis tsis nyiam hais xim tsis muaj lub rooj hai xim lo yeej tau (Vim yeej muaj ntau ntau lub ntees tsis muaj lub rooj hai xim).

IX. Hnub Tshwm Tshav (Tawm Nra - Sam Sab)

9.1 Npaj Tawm Tshwm Tshav

     Ua ntej yuav tshawm tshav (Tawm Nra), Thaum txiv xaiv coj xyom cuab xem lub mos xyom tag (yog tsis muaj xem mos xyom lo thaum hais txiv xaiv tag) ce kaj ntuj lawm, thaum no ce pib cov hauj lwm li hauv qab no:

- Kav xwm nqua hu kom txiv qeej sawv lo tshuab qeej ncej xub qeeg

- Kav xwm kom cuab tsav lo ntawg ntawv

- Thaum cuab tsav ntawg tas yuav tsum ce ib khob cawv rau txiv qeej, kom nws pab tshuab qeej hlawv ntawv -  Qeej tawm nra (Qeej sawv kev)

-  Hlawv cov ntawv rau tu tuag

-  Hlawv ntawv tag ce tshwm tshav

-  Tawm nram qhov rooj tag mu

- Ncig tshuav; poj niam 5 ncig ; txiv neej 7 ncig. Ncig txij lub nrua lo pem no xwb (Ncig thaum twg) ....?

 9.2 Tshwm tshav (Tawm Nra)

Ntawm qhov chaw tawm nra yog muaj nyuj tua ces tag kis ntawv tsi tau kaj ntug muam phauj/Txiv dab laug (tua nyuj) thiab cuab tsav yeej khis nyuj (twm) cias lawm (Tuas ib tug tsiaj yuav tau txua ib tug noog cov mu txhos rau nram qab qhov chaw tua nyuj).

Thaum muab tu tuag coj tuaj tshwm tshav lawm, ce cov hauj lwm muaj li no:

- Muaj ib tug ntxoo dai lub nruas (Thiab 2-3 tug rau txiv qeej txiv nrua tau khuam nqaij xwb) - (Qhov no yog txiv qeej hauj lwm?

- Txhos ib co ntxhoo roos tus tuag – qhov no yog cuab tsav thiab xyom cuab hauj lwm (Hmoob vaj ntxoo)  txiv neej txhos 7 tu txhoo, poj niam txhos 5 tug ntxhoos

- Ntawg cob tsiaj

- Tshuab qeej cob tsiaj (qeej tawm nra) rau tag mam tua nyuj 

- Tuas nyuj (Huas nyuj siav - txawb nkoj huab nkoj cuas, ib tug nyuj ib lub nkoj/noog)

- Tos txog tav su dua ce coj mu zais lawm xwb.

Qhia Kom Paub:

- Ntawm ob tug pas tiag nees (Thaum ub tej laus lawv txos 4 tug ncej mam pav ob tug tiag nees rau ce mam tso ob tog taws nees khuam rau) txheej tshiab no muaj lub hleb lawm sawv daws teem qis qis lawm xwb, tsis npaj cov tiag nees no lawm lo tau (vim tsis siv lawm)  

- Tu cuab tsav lawv yog neeg tsev lawm, lawv tau thov thawj lwm tub ncig tuaj pab lawv ua hauj lwm lawm, nws muaj cais hlais cov nqaij tus tsaij nws tua coj mu uas nqaij tus moos rau tej thawj lwm tub ncig.

- Kev xav xwb,  lub neej tom ntej yog peb hmoob muaj lub zeem muag yuav khos kev ntseeg tiag, yuav tau pib ntawm muam phauj thiab txiv dab laug tuaj, es xub ua pib huav yus tsev thiab ntawm yus tuaj, ib tug ua rau pej kum hmoob pom ces cov nyiam mam xyaum, txhob tos 18 xeem hmoob pauv es mam pauv, nyias yuav tau tsim khos lis qhov nyias pom.

- Xav kom lub neej tom ntej no hloov pauv tau, yog hnub twg kuv thiab koj yog muam phauj lo yog txiv dab laug ntau nyuj xav kom kuv thiab koj hlias nqaij tu moos ib qhos rau tu txiv qeej (tuaj tsuab qeej cob ntawv) thiab ib qhos rau tu muam phauj lo yog txiv dab laug nias tsum xwb, kuv thiab koj wb tsis txhob kwv lub ntsov nyuj lawm. koj ua pua tau qhov no mas?

- Yog koj thiab kuv ua tau tej zaum ntev mus lwm tu yuav ua li wb ua, ces cuab tsav lo yuav tsis kwv lawm thiab, ces peb yuav hloov pauv qhov no tau (Vim li ca thiaj tham zoo li siab me me?) vim tia peb nrog mab nrog suav tham mas luag phej hais tia peb hmoob mas thaum ib tug tuag lawm mas tuaj sib faib nqaij tag mas nyia mam mu nyia tsev lawm, luag lwm tsob neeg saib luag pom tau tia peb tsev hmoob ntawv twb txom nyem lawm cas hos tsi muab tua coj lo ua zaub noj, es cas hos muab tua sib faib xwb - luag lwm haiv neeg lawv tsis nkag siab txog qhov qhaij tu moos tia peb muab tu moos no, yog thaum luag ntau tsob neeg saib peb mu rau qhov tsis zoo lawm, peb cov hlua thiaj xav tia yuav tau hloov qhov no thiab? Muaj ib cos yuav xav tia yog ruam lo cas hos tham tej niag no? Tab sis koj thiab kuv pua tau xav tia cas peb noj tshoob noj kos es cas peb tua ib tug nyuj xwb peb noj hau nchuav ntws... tu tuag tuag lawm cov nyob yog tshuav tej tub tej kiv tseem me lawm tseem yuav ua neej lawm tom ntej ... xav kom peb saib cov caij thiab kev kawm tseem ceeb duas...? koj xav li ca txog qhov no? thov koj sau teb cov lu nug no tia koj xav li ca? yog koj tau nyeem tag lawm

9.3 Ntim Su

     Kev ntim su npaj tau thaum twg ntim thaum ntawv tsis pub kom dau hnub sam sab (Ntim kom tau ua ntej yuav coj mus zais xwb) yog npaj tau mas ntim thaum ua ntej yuav taws kev rau tu tuag: 

- Muab ib tus me nyuam qaib tua (muab thooj siab ci kom siav) 

- Yog txiv neej ces ntim qhov siab kib nrog ib lub txhuv  coj mus xaws rau ntawm lub tsho npuab xub ntiag sab lauj 

- Yog poj niam ces ntim qhov siab kib nrog ib lub thiab ib yas txhuv  coj mus xaws rau ntawm lub tsho npuab xub ntiag sab xis 

- Muab tus qaib tua yuav lub saib no tseev coj mus qha ntawm qhov cub; puv 3 tag ki yuav muab haus coj mus tawm tshais.

Qhia Kom Paub: 

      Kev ntim su no nws muaj zaj dab neeg tias tu txiv neej muaj zog mu hloov ris tsho nraum ntsuj plig teb ces noj tag ib twg xwb,  ho tus pojniam tsis muaj zog mu qeeb nws mu hloov ris tsho nraum ntuj plig teb ces nws noj tag ib twg tsib. Thaum tuag ces thiaj ntim ib lub txhuv rau tu txiv neej,  his tus poj niam noj tag ntau dua ces thiaj ntim ib lub thiab ib yas txhuv rau tu pojniam. 

      Txheej niam no muaj ib cov laus  cov txawj neeb lawv kuj tham tia "Ntsuj plig rov lo hai tia txheej tshiab no thaum muaj ib tug  tuag yuav tau ntim su kom sib npaug (ib leeg 1 lub thiab ib yas ib yam), vim qhov ntim txhuv tsawg dua rau tu txiv neej thiaj ua rau ntaub noj ntawv haus ntau txiv neej tag ua ntej, cov txiv neej siav thiaj luv dua cov poj niam, Ces ziag no muaj ntau tsob hmoob lawv ntim sib npaug zo lawm. Poj niam txiv neej lo lawv ntim 2 lub ib yam kiag lawm.

X. Coj Tu Tuag Mus Zais

10.1 Thaum Coj Tu Tuag Tawm Mu Zais

A. Npaj Xov Txheej (Ntawv Xov Txheej)

Yuav tau npaj ib cos xov txheej thaum coj tus tuag tawm mu yauv tau siv taug kev (Ua nqis kev rau tim tswv teb chaws).

B. Rauv Taws (Cub Tawg) Thiab Npaj Dej Ntxuav Tes Tom Kev

Thaum kwv tu tuag tuaj mu faus lawm, cov xyom cuab ua nyob tom tsev yuav tsum mu rauv taws rau tom ncauj ke txoj kev ua kwv tus tuag tawm mu, txhawm rau thaum cov neeg mu zais qauv lo thiaj tau lo ntxuav tes thiab sub tes (Ua kev cais ntxuav kev phem kev tsis zoo).

1.     C. Ua Dav Noj Qaib

           Hmoob vaj ntxoo (Noob kooj neeb) yog ua dav noj qaib thuam txog tom ib tog kev yog muaj chaw zoo pov tu qaib ces tu txiv cuab tsav muab tu qaib cuam pov tseg ces hais tia" Dav noj qaib lawm lau" Ces txiv cuab tsav muab lub thoob/lo yog lub phauj taub/lo yog lub pob tawb pov tseg thaum ntawv.

      Qhia Kom Paub:

          - Tsob hmoob twg tsis sua dav noj qaib ces lawv nqas tu qaib coj mu faus rau ntawm tu tuag ib sab nram kos taws lawm xwb

         - Tsob hmoob twg ua dav noj qaib ces muab pov tseg lawm ces dag tia dav noj lawm xwb (vim tsis xav coj mu faus nrog tu tuag, thiab tsis xav coj mus tso rau tom toj ntxas tsam thaum xa tshai mu ces tsws phem xwb)

          -  Txheej tshiab no yog muaj zej muaj zos tsis zoo ua dav noj qaib lawm ces cia li muab pov rau pob tawb khib nyiab lawm xwb lo tau, ces lwm hnub mam xa tshais mu rau tom ntxa 3 zaug lawm xwb, tag kis thib 3 mam hais rau nws tom ntxa kom tav su nws lo tom tsev xwb. Qhov no ua tsis txaum, yog tia tom ntej no muaj zej muaj zos lawm tsis zoo ua dav noj qaib, thiab tsis zoo xa tshais rau tom tej ntug kev, vim yog luag vaj luag loog luag tsis kam yu ua li ntawv (Qhov no pauv lo yeej tau cov nyob sab Meka hloov tag lawm)

10.2 Ua Ntej Yuav Khawb Xeev (Lub Qhov Ntxa)

- Hlawv ntawv rau tim tswv teb chaws (Txiv Cuab tsav), tia hai rau tim tswv teb chaw yuav thov tso tu tuag rau qhov chaw ntawv.

- Cuab tsav pib khawb ua ntej

- Tub kis pib…

- Tub xyom cuab sib pab khawb xeev kom tiav…

10.3 Ua Suav Huas Tom Ntxa (Ua Ntej Faus)

Tu txiv cuab tsav lo ua suav huas: Siv rab txua / txhib ntawg lo ua suav haus (hom rau saum lub hleb lo yog cov khaub ncaw lo tau), Ce hais tias:

=> “Suav huas koj tsho koj tias koj tsho ntuag, Suav huas koj (tiab, koj ris - yog yog tus poj niam los txiv neej) - koj tias koj tiab ntuag. Suav huas koj phuam , koj tias koj phuam ntuag, suav huas koj khau koj tias koj khau ntuag. Suav huas koj su koj tias koj noj tag...”

Qhia Kom Paub:

        Yawg vam lauj nyob meka piav tia kev ua suav hau no mas yog cov laus txheej thaum ub nyob suav teb suav phej txhav txhav khem, phej huam txheeb peb hmoob tej khoom ces thaum tuag thiaj ua suav huas xwb. Tiag tiag mas Thaum ub cov laus ua vim cov lau txheej thaum ub yug nyob suav thaum tuag ntawv tus txiv tawv kev taws kev rau tu tuag mu nqa tsho tsuj tsho npuag pem sauv teb, ces thiaj taws kev mu hla toj kab ntsuab, dawm kab ntsig, mu hlas tiaj suab puam (ntuj tsha teb nqhuab ces thiaj muaj ua suav hua xwb. Cov tub cov kiv ua lo yug rau sab xov tshoj (sab nplog teb, nyab laj teb, thaib teb thiab meka teb) lawm ces tsis ua suav hua lawm, vim thaum taws kev ntawv cia li taws mu rau lub teb chaws, mus rau nws lub zos ce mu nqas tsho tsuj tsho npluag ce mu cuag poj cuag yawm lo yog mu thawj thiab lawm xwb. Muaj ib txhias tseem taws kev li tej lau thaum ub vim sawv daws tsis paub qhov tseeb tiag ces thiaj taws kev li xwb (vim phej ua li tej laus ua xwb tsis nug lub ntsiab qhov tiag). Txheej tshiab niam no hmoob thaib hmoob Meka hloov tag lawm, nyob nyob sab nplog muaj ib nrab kuj hloov lawm thiab, tab sis muaj ib nrab tseem nej hnub ua li qub. koj nyiam qhov twg ua qhov ntawv lo tau tsis txhaum ... tab sis qhov tiag yeej muaj li sau tseg lo no xwb.

10.4 Thaum Yuav Faus (Yuav Npoog Av Rau) Saib Vam Saib Khib

-          Cov tub kis hu tu tuag (Kom saib yus ua neej … kom tag)

-          Tu txiv cuab tsav, (Hais tus tag sim neej lub npe....)

=> “Saib Vam Sab Khib...Sab ntuj kag...Saib ntuj hu....Tag koj 1 sim neej nawb mog...

(Hais 1 zaug qhib daim txiv txiag 1 zaug, lo lus kawg ces kaw daim txiv txiag rau tsis qhib lawm, Yog tsi qhib cias li hai lo yeej tau vim sov sov sab chaws qis tsis zoo qhib lawm).

Qhia Kom Paub:

        Yawg Vam Lauj nyob meka piav tia, Kev ua vam sab khib no lub ntsiab lug tiag yog:

- Peb hmoob ntseeg txog mem toj mem av thaum yuav fau tus tuag thiaj hai ib lo lus tseg kom tu tuag txhawb cov nyob tom qab hauv nruab yeej kom cov nyob ua neej zoo.

- Yog qhia rau cov mus zais qauv ntawv paub tia ua neeg nyob kom txhob tuam tuam yim, muaj ib hnub twg yeej yuav txhawj tuag yog av nplog qhov muag lawm ces tag li ntawv lawm (kom nyob siv hlub, txhob siab phem, txhob lim hiam, txhob qias dub ....)

10.5 Txiav Tu Nees

Thaum faus tas ces muab ib rab txua rau ib tug thov kom nws txiav tu nees, cov lu hai thaum tiav tus nees:

=> Koj nyob lo koj tsis ciaj tsov - Koj mu lo koj tsis ciaj dab - koj ntev koj ua 3 yas koj luv koj ua 2 yas, . (Ce muab tu nee txiav xwb, yog ntaev ces txiav ua 3 yas, yog luv ce txiav ua 2 yas lihai xwb).

Qhia Kom Paub:

         Yawg Vam Lauj nyob meka piav tia peb hmoob ntseeg tia tu nee ntawv muaj tu xyws thuam peb ntua nywj, nquam nkog peb hmoob ntua txog tu nees txaij nee nraug -nee txiaj nee kuas (Yog tu nee kwv tuag no ntag) ces thaum paus tag thiaj muab txiav kom txhob ua tu xyws rov qab lo lawm. qhov no yog qhov tseeb ntawm qhov muab tu nee txiav.

10.6 Teem Tshais (Thaum Faus Tag)

Thaum faus tas ces cuab tsav tuav tus txhib ntawg hais tias:

=> “Taus txuas ua koj vag-koj tsev, plig tsis muab rau koj-plog tsi muab rau koj:

-  ib hli muaj 30 nyoog,

-  ib ntsug muaj 13 hnub,

- muab 10 hnub rau koj coj mu xib dab,

- muab 3 hnub rau koj nyob saib vag-saib tsev 

- mam xas tshais tuaj rau koj noj.

(Hai li no tag ce lo tsev lawm xwb, yog yuav ua tsaug lo tu cuab tsav mam coj cov tub xyom cuab pe ib pes hais tias “Khwv saum kwv tij neej tsa auv!!”) ces sawv daws lo tsev lawm xwb, Yuav tsum lo tom xyom caub tsev tag. Yuav mu tsev mam mu vim yuav lo ua kev cais ntxuav kev phem kev tsis zoo tom kev.

XI. Tom Qab Lub Ntees Tiav

11.1 Nquam Nkog

Nquam nkog yog ib qho kev cai uas hmo ntawv coj tus qauv mus zais tag lawm ces yuav tau ua qhov kev cai no. Tej laus hais tias kom tej tsog tsuag txhob los phov vaj phov tsev los yog sau kev phem kev tsis zoo mus kom tag.

Cov khoom npaj siv thiab cov lus hais

1.     Txiav 3 tug me nyuam pas me me , kom ntev li  1 tshim npab (0.5 mev)  .

2.     Siv 3 txoj ncaus los Khi 3 lub voj zawm rau 3 tug pas (Ib tug pas ib lub voj). Yog tsis muaj ncau siv hlua hnab tsaj los tau.

3.     Tuav 3 tug pas uas koj zawm tau cov voj khi tag no nqa mus cheb koj lub tsev  ntawm chaw nyob mus rau hauv plag, qhov txhia chaw thiab hais cov lus tias:

=> “Kuv  nplawm  no mas  nplawm hleb rag hleb rhaws, kua muag iab kua muag daw ntsuj puam tais laig nyag, suab quaj suab nyiav, suab qeej suab nruas, nees txaij nees kuas .. kev phem kev tsis zoo mus kom tawm rooj tawm ntsa (hais tus txiv tsev lub npe...) lub vaj lub tsev no mus kom ntsej tsis hnov muag tsis pom kom nws tsev neeg tsuas ntsib kev noj qab nyob zoo xwb nawb”.

Hais tag li no tag ces nqa 3 tug pas no tawm coj mus txhos rau nram kev (Txho kom dhau ntawm lub qhov cub thuam mus zai qauv lo es lo sub tes ntawv) raws nraim li daim duab nram qab no. Hmo 2 los koj ua tib yam nkaus, hmo 3 los ua tib yam nkaus. Qhov no ua puv 3 hmo xwb ces tsum.

Txhos cov voj hmo 1, txhos hmo 2 kom ze zog tsev, ce hmo 3 kom ze zog tsev (Txhos tov rov lo rau tom tsev)

 

Qhia Kom Paub:

        Yawg Yeej Koob piav tia, Hais  txog ntawm qhov nquam nkog no nyob sab Mekas lawv tsis nqua nkog lawm, vim tia muaj lub tsev pam tuag lawm sawv daws tsis ua lub ntees tuag pem tsev lawm ces thiaj tsis muaj qhov nquam nkog lawm (vim tias kev nquam nkog no yog yus ntau nplawm tej suab quaj suab nyiav, suab qeej suab nruas, thiab vij mob vij tuag, xyws dab poj ntxoog, dab tsog tsuav hauv tsev tuaj mu ces yus ua rau kom txhob lo lawm xwb, yog mus ua ntee nram tsev pam tuag lawm ces hauv yu lub tsev yog tsev dawb tsev huv).  

11.2 Tawm Tshais       

Tom qab muab tu neeg zais tag lawm yuav tau suav tag kis kaj ntug ua Tag kis 1; Tag kis 2; Tag kis 3; Ces tag kis 3 no xa tshai mu rau noj:

- Thawj hnub xa mu rau tom ntxa

-  Hnub thib ob xa mu rau tom ntxa (Ib yam)

-  Hnub thib peb xa rau tom ib tog kev tom dav noj qaib lawm xwb 

Npaj li no:

     Txua 3 lub raj: 

      1. lub ib dej ntxuav muag

      2. lub ob rau cawv

      3. lub peb rau nqaij qaib

       - Npaj ib lub pob tawb ntim ib qhov mov rau hauv

 - Npaj ib tug pas coj mu txhos(Txhos rau  tawm ib sab ntxas), thaum mu txog muab cov raj thiab lub pob tawb khuam rau. 

1.     Thaum coj mu txog ce hai tia:

=> (Tag ki 1 thiab 2)... kuv xa tshais tuaj rau ntawm no, mov nyob qhov nov, dej ntxuav muag nyob qhov nov, nqaij nyob nov , koj sawv lo muab noj nawb.

=> (Tag kis 3, Xa rau tom dav noj qaib) ... kuv xa tshais tuaj rau ntawm no; dej nyob nov ; cawv nyob nov, mov nqaij nyob nov koj los muab noj nawb es tav su koj los noj su tom tsev nawb.

* Ce thaum noj su, hmo, tshais txhua zaum yuav tau muab ib rab diav coj lo txho ntxeev tiaj rau saum tais mov es hu tia lo noj mov nawb mus txog thaum tso plig mam tsum.

1.     Qhia Kom Paub:

Hai txog ntawm qhov tawm tshais, yawg yeej koob thiab yawg vam kub nyob Meka piav tia chiv keeb thaum ub pib lo ntawv yog ib tug tau tag sim neej lawm ces tsev neeg hlub hlub es mu saib ces npaj mu rau xwb (zoo ib yam li nej hnub niam no yu rov mu saib yu niam yu txiv tej qub txwv zeej yu yeej npaj xyab ntawv thiab npaj txiv hmab txiv ntoos zaub mov nqa mu, thaum mu txog yu yeej mu hua tia tuaj saib koj es npaj zaub mov tuaj rau koj, ce yeej hlawv tej xyab ntawv rau. Qhov no peb hmoob ua vim tia hlub hlub tshua tshua xwb, yog tsi npaj lo yeej tsi ua ca yeej tau ib yam. Tom ntej no yog tsi xa tshai rau noj lo yeej tsis txhaum tej lau thaum ub ua vim hlub hlub es ua ces sawv daws cia li ua lo lawm xwb.