NEEB SAU SUB PEB CAUG THIAB NEEB NTAWV
I. Keeb Kwm
1.1 Neeb Sau Sub Peb Caug
Qhia Kom
Paub, Yawg Vam
Lauj piav tias:
Thaum ub muaj ib tug phauj hus ua pliag ntsaim muaj ib plab me nyuam ces tuaj saib yawg kooj neeb (Tuaj saib niam tia yawm txiv xwb tsis yog sib nrauj), Vim thaum ub kev mu lo ib lub zo rau ib lub zo tsis yooj yim thiab mu kos taws xwb, Pog kooj neeb hais rau yawg kooj neeb hais tia yuav lo yug me nyuam lawm kom yawg kooj thauv ib lub maum kaum rau tus phauj yug me nyuam. Yawg kooj hais tia yog yus tu ntxhais yus hlub hlub kom cias yug me nyuam hauv tsev kiag xwb, yog hos muaj teeb meem los tsua kawg yawg kooj neeb ua 2 thaj neeb xwb ces dhau lawm. Yawg kooj neeb hais lis xyov nws ua neeb tag lawm lo tsis ua tsis muaj neeg paub, Tom qab thaum yawg kooj neeb tau tag sim neej lawm ces cas peb tsev hmoob vaj ntxoo ua yog yawg kooj neeb cov tub kis no mu ua noj ua haus phej raug riam, raug txua, raug phom, kev tu tub tu kiv lo phej muaj muaj teeb meem ces sawv daws thiaj sib tham ces thiaj ua thaj neeb sau sub no, thaj neeb sau sub no thiaj ua uas ntej yuav noj peb caug, lub hli noj peb caug (ua hnub 25 / lo yog 27 / lo yog hnub 29 npaj tua hnub twg ua hnub ntawv lo tau) ces thiaj nqas tej riam tej txua, tej hlau, tej taus, phom, ... (tej cuab yeej ua noj ua haus) coj mu ua thaj neeb - coj mu lwm sub, thaj neeb no muaj ib nqes ua txog cov sub tub sub nyuam ntawm tu phauj npliag ntsaim, Ntawm cov sub tub sub nyuam ntawm tu phauj ntawv thaum ua neeb ces muab ntiab rov mu rau hmoob muas vim tu phauj ntawv yog tuaj tom hmoob muas tuaj. Ces thaum hmo noj peb caug peb thiaj tsis lwm sub - thiaj tsi nkaum toj qaib vim peb tsis muaj sub sib ntau sib tuas nrog puj sub li lwm xeem hmoob, muaj tej tsev neeg lawv ua thiab tab sis yog mu nyob nrog zej zog loj luag ua ces mu ua raws luag xwb, Tu twg hos nyiam lwm sub mu lwm lo yeej tsis txhaum, tu twg tsis nyiam tsis lwm lo yeej tau. Ces peb tsob hmoob vaj no thiaj ua sub txawv duas lwm xeem hmoob thiab hmo noj peb caug thiaj tsis lwm sub.
Kev Daws Teeb Meem Tom Ntej:
1. Yog peb hmoob muaj kev ntseeg li ntawv tiag yuav tau npaj ua ntej es rhiav chaws rau los daws cev txawm yog yu tub yu ntxhais lo xij vim nws tseem yog nws ib xeem hmoob, kom txhob pua dab pua qhuas es thiaj tsis nyuaj rau lub neej tom ntej, Yog tias hos yog yu tej nyab lo xij yog cev tsis tab seeb es zes lub caij yuav los daws cev lawm yuav tau txhob cias mu saib neej tsa thiab txhob cia mu kev deb lawm.
2. Yog nyob+ hos muaj tej ntxhais mu ua neej tsis kawg rov qab lo hauv tsev ces yuav tau muab qaib lo lwm, hu plig khis tes ua siab tub siab kiv duas, ua yus dab yus qhuas duas, thaum hus plig khis tes ua siab tub siab kis rov qab ua yu xeem yu dab yus qhua lawm ces nws muaj mob muaj nkeeg, nws hos tus tub tus kiv lo thiaj tsis nyuaj. Vim li cas hos hai tia yog rov hu plig ces tau? vim hais tia peb tus tub twb mu yuav tau ib tug sab nrauv (yuav tau tu poj nrauj, poj ntsuam, nkauj feb, nkauj fas ua twb yog tus neeg xyob txhiaj sab nrauv) lo ua peb neeg tsev tau, thaum peb coj lo lwm qaib coj lo hu plig khis tes tag lawm ces twb lo ua yu xeem lo tus tub tus kiv thiab muaj mob muaj nkeeg lo nyob tau hauv peb tsev ib yam li ib tug tub tsi txhaum, ces peb cov ntxhais lo ib yam, txij hnub no lawm yav tom ntej peb yuav tau ua li no (Lwm tsev hmoob thiab lwm xeem hmoob tsis ua lo xij, peb tsev no yuav tau hloov mu li no) tsis txhob cais peb tu ntxhais lawm, Tej lau txheej thaum ub coj li ua li vim peb hmoob lau thaum ub lub siab nqaim dhau lawm xwb es ua saib tsis tau peb tu ntxhais xwb. Txheej tshiab no sawv daws yuav tau hloov ua ab tsis lo yuav tau ua kom 9 pluag sib luag 8 pluaj sib ntes vim muaj txoj cais ntiaj teb luag hai txog kev muaj vaj huam sib luag lawm, txoj kev ntseeg qhov twg zoo khos muab khos rau kom zoo nkauj kom ncaj thiab kom dawb huv es luag lwm tsav neeg thiaj saib tau peb tsob neeg peb thiaj vam meej, muaj tu txawj tu ntse mu nrog luag sawv sib txig lo thiaj muaj lub meej mom mu fim tau luag thiaj mu coj tau luag, vim peb cov tub kis txheej tom ntej no tsis yog yuav lo coj peb tsev kwv tij, tsis yog yuav lo coj peb xeem hmoob lawm xwb, yuav nrog luag lwm tsav neeg sib tws kev txawj kev ntse yuav lo ua tu coj tag ib lub teb chaws tag tsav neeg hauv lub ntiaj teb no lawm.
1.2 Neeb Sub - Neeb Ntawv (Thaj thaiv thiab Thaj thib)
Qhia Kom Paub, Yawg Vam Lauj piav tias:
Lub kees tiam ntawm txoj dab neeg ua pib ua ob thaj neeb no mas yog thaum ub kev ua tsov ua rog ntawm kob rog Pov Hwm Yej muaj neeg tuag tshaib tuag nqis coob dhau lawm ces sawv daws thiaj ua ob thaj neeb no xwb. Keeb kwm piav tia thaum is pov hwm yej lawv nyob suav teb, pov hwm yej txoj hauj lwm yog ib tug tub yug nyuj - saib nyuj rau vaj ntxwv hmoob, muaj ib xyoo muaj tsov rog suav liab tuaj txeeb teb chaws, thaum pov hwm yej lo pem tshav nyuj lo txog tsev ces cov peeb zeej twb mu ntau rog tag lawm lawv tsis tos pov hwm yej, Pov hwm yej nug tia cas hos tsis tos nws lo mam mus? lawv hai rau pov hwm yej tia Vaj ntxwv thiab niam vaj ntxwv lo yug tau ib tug tub vaj ntxwv sawv daws tsis khoom thiaj tsis tau tuaj raws nws xwb, tsov rog loj heev kom nws lawv qab mus tsam ntau rog tsis yeej. Ces pov hwm yej thiaj coj Lauj Pov Txoov lawv thiaj lawv qab mus tuas ntsuj rog ntawv, Ntsuj rog no pov hwm yej lawv ntau yeej los tab sis lawv cov tub rog tuag coob heev (muaj ib nrab yog tuag tshaib tuag nqhis - muaj ib nrab yog tuag rau kev ntau tsov ntau rog). Tom qab no sawv daws nyob muaj muaj mob muaj nkeeg ces hmoob thiaj ua thaj Neeb Ntawv no. Thaj Neeb Ntawv no lub ntsiab tiag+ yog ua mu koos cov ntsuj ntawm cov neeg kom txhob muaj mob muaj nkeeg kom txhob raug vij sub vij swv, hos cov tuag lawm ces ua mus sau vij sau swv kom txhob lo aiv tej txwv zeej txwv koob ua tau ua tsov rog es tau tuag lawm ntawv, kom lawv thiaj tsis nphaus cov vij cov swv ntawv rov lo rau tej xeeb leej xeeb ntxwv tom qab.
Ces thiaj siv tus npua lo koos ntsuj rau cov nyob saum yaj, hos thiaj siv tus tshis lo ris vij sub vij swv thiab thiaj txua moj zeej, riam phom rau tu tshis ev. Qhov no peb hmoob ntseeg tia yog siv tu ntshi lo ua tu thawj tub rog coj cov moj zeej ntawv thiab cov riam phom ntawv mu tuas vij sub vij swv vij tsov vij rog ua phej lo aiv txwv zeej txwv koob kom tag mus es mus thaiv kom txhob lo aiv rau txwv zeej txwv koob lawm, kom txwv zeej txwv koob txhob nphaus lo rau cov cuab twj yim lawm (txhob nphau lo rau tej xeeb leej xeeb ntxwv tom qab lawm).
Thaj neeb ntawv no twb ua lo ntev kawg nkau li lawm vim peb hmoob tsis tau muaj sau ua ntaub ua ntawv tseg ziag no sawv daws twb tuav tsis tau tia pov hwm yej lawv yog tiam twg lawm? thiab twb nco tsi tau tia thaum lub sij hawm ntawv pov hwm yej lawv nyob rau qhov twg tiag tiag? Sawv daws sim xav seb pua tsim nyog ua thaj neeb ntawv no lawm? Vim tia lub sij hawm tom qab no sawv daws twb ua kob rog Paj Cais nrog neeg fab kis no peb hmoob neeg tuag coob heev lo peb hmoob twb tsis ua neeb ua yaig li, dhau ntawv lo twb lo ua kob rog CIA ua Yawg Hlob Vaj Pov pab neeg Meka ua nrog nyab laj qaum teb no lo peb hmoob tuag coob heev lo peb twb tsis ua neeb ua yaig li thiab, yog ua zoo muab xav txog tej qhov no ces yeej tsim nyog muab thaj neeb no kaws cia lawm. Ces cov kwv tij ntawm peb tsob hmoob vaj ntxhoo - Noob kooj neeb no thiaj tau hus sawv daws sib sab laj sib tham txog kev xav ntawm qhov ua thaj neeb lo kaws thaj Neeb Ntawv no.
Qhia Kom Paub, Yawg Vam Lauj piav tias:
Thaj neeb sub sau sub noj peb caug thiab neeb ntawv (Thaj thaiv, Thaj thib) Yawg Vam Lauj hai tia yawg twb ua neeb mus muab 2 thaj neeb no kaws thiab ntsia tseg lawm. Thaum sib tham ua thaj neeb mus kaws 2 thaj neeb no, cov nyob sab Meka cov lau 60% tsi pom zoo-Cov lau 40% pom zoo, tab sis cov hlua yeej pom zoo 100%, cov nyob sab Meka tau hu lo nrog cov nyob sab nplog sib tham, tau tham rau cov coj nyob sab nplog sawv daws tsis pom zoo 100%. Vim cov lau 40% thiab cov hlua 100% cov nyob sab Meka pom zoo ua thiaj neeb mu muab 2 thaj neeb no kaws tseg ces thiaj tau ua thiaj neeb no lawm, thaum ua ntawv txawm sawv daws tsis koom siab sawv daws tsis sib pab nyiaj tuaj ua txhua+ yim neeg lo xij raws kev sib tham thiab kev sab laj cov hlua feem coob thiab ib nrab ntawm cov niam txiv tsis pom zoo yeej hai tias kom yog ua lawm ces ua kom tag ib cuab xeem hmoob kom txhob tseg tws lawm, lub neej tom ntej yog twg hos tsis nyiam ua lawm lo cia li muab tso tseg lawm xwb es thiaj tsis nyuaj. Ce thaum ua ntawv 40% cov pom zoo ntawv thiab ib nrab ntawm cov hlua ua cov lau tsi pom zoo ntawv sawv daws yeej sau nyiaj tuaj sib pab ua thaj neeb, Tu txiv neeb yog yawg vam lauj, Thaum ua thaj neeb no ce yeej ua mu kaws 2 thaj neeb (Neeb sau sub peb caug thiab thaj neeb ntawv) no lawm.
Lub neej yav pem suab (yav Tom ntej no) cov nyob sab Meka yuav tso ob thaj neeb no tseg tsi ua lawm, vim tia cov tseem pom zoo ua ntawv yog cov laus lawm xwb, cov hlua yeej pom zoo kaws cia lawm, thaum twg cov laus tag mus lawm ces cov tub cov kiv cov xeeb leej xeeb ntxwv yuav tig los koom cov ua muab tsos tseg lawm ces ntshe yuav tshuav cov nyob sab nplog thiaj tseem ua lawm xwb.
Thaum ua thaj neeb yawg vam lauj tau ua sau tag tej vij sub-vij swv lawm li hauv qab no:
1. Yawm Vam Lauj tau ua neeb ntawm Meka no mu rau suav tuam tshoj mu sau thiab mu cais cov sub tub sub nyuam, cov vij muas txwv zeej-muas txwv txoob ntawm yawg kooj neeb tsev thiab nws tej xeeb leej xeeb ntxwv tsev, ce tau lo sau sub raug taus sub raug txua, sub raug riam sum raug phom, sub poob dej poob cav, sub ntoo ntau sub zeb tsuam, sub tsheb tsoo sub tsheb ntog, sub nab ncaws sub tsov tom, sub sib cav sib ceg, sub noj tshuaj sub dais tuag, sub sib npav sub sib foom ... tag ntawv ce yawg vam lauj tau lo sau cov sub ntawm thaj Neeb Ntawv ua yog ob thiaj neeb Pov Hwm Zej lawv ua 9 ntsuj tsov 8 ntsuj rog es muaj cov neeg tuag tshaib tuag nqis ntawv puag pem txiv yawg kooj neeb tsev, sau tag nrhos 3 txheej 3 tis - 9 tiam txwv zeej 9 tiam txwv koob, Pib sau saum yaj tag mam tig mu sau nruab yeeb rau cov txwv zeej txwv koob, sau tag-daws tag ces mas thauj coj mu rau toj zeb zag teb, mam mu qhib toj zeb zag npoos ntuj qhib - toj zeb zag npoos teb qos mam coj mu kaws cias, mam muab tsu tshis ncau thaiv tseg, yawg tau hai rau txwv zeej txwv koob tia yog tshuav tu twg tseem muaj nas qab vag noog qab zeg tshuav vij tshuav swv ntau tuaj lo kom qhib kab qhib kev es ntau mu kom dhau xwb, Hnub no yawg kho lawm mas ntawm yawg kooj caj yawg kooj ces no mas kom 9 tiam poj 9 tiam yawm mas tsis pub fam lawm, Tu vij tus tub-swv tus kiv, tu vij ua tsov swv ua rog no muab coj mu kaws cias tsi pub aiv rau txwv zeej txwv koob, tsi pub fam rau tom qab lawm, kom txhob muaj vij muaj swv lawm.
2. Tau sau vij ntaub ploj ntawv tuag, vij ua dab swv ua npog, vij ua tsov swv ua rog, vij tuag riam swv tuag phom, vij tuag saum txaj swv tuag saum chaw, vij tuag nruab zoov swv tuag nruab tsuag, vij tuag nruab nkaub swv tuag nruab qes ... sau tag nrhos 3 txheej 3 tis - 9 tiam txwv zeej 9 tiam txwv koob lawm.
3. Ntawm qhov muab tu tshi ncau coj mu thaiv no yawg vam lauj hai tia tus tshis tiag nws muaj ntsuj plig, ib xyoo 12 lub hli tsam nws yuav mu thawj thiab, ces rov ua teeb meem dua thiaj tau fiab tu tshi ncau loj+ coj lo ua thaj neeb thaum ua neeb mam rau siav rau pas kom muaj zog xwb es thiaj thaiv tau mu tag ib txhis.
4. Ntawm tu Npua koos ntsuj lo tau fiab ib tug Npua ncaus loj+ coj mu koos tag sawv daws tej ntsuj thiab twb koos tag nrhos 3 txheej 3 tis - 9 tiam txwv zeej 9 tiam txwv koob ntawm yawg kooj caj ce lawm. (Vim tia tu npua ncau tsis muaj ntsuj ua neeb mu ce mam rau siav rau pas xwb es kom nws thiaj tsis mu thawj thiab thiaj koos tau mu ib txhis)
5. Twb lo tsim liaj ias teb chaws, tsim vaj tsim tsev tag nrhos rau 3 txheej 3 tis - 9 tiam txwv zeej 9 tiam txwv koob ntawm yawg kooj caj ce lawm, mam muab nyiaj txiag-xyab ntawv rau.
6. Thaum ua tag ce twb lo ua ib rooj mov rau txwv zeej txwv koob noj, hlawv tag 300 lub yaj khaum yeeb khaum, 100 ntshua ntawv cob tag rau txwv zeej txwv koob lawm. ntawm cov nyiaj txiag -xyab ntawv muab faib ua tej pawg-tej pawg hlawv rau ib tiam zuj zus, hlawv tag nrhos 3 txheej 3 tis - 9 tiam txwv zeej 9 tiam txwv koob ntawm yawg kooj caj ce lawm, yeej ua tiav tag muab thaj neeb sau sub noj peb caug thiab thaj neeb ntawv no kaws tag lawm.
7. Txij no lawm tom ntej kom tej xeeb leej xeeb ntxwv txhob ua 2 thaj neeb (Thaj sau sub noj peb caug thiab thaj neeb ntawv) no lawm, tsis hai cov nyob sab Meka lo yog cov nyob sab Nplog teb tu twg hos tseem xav ua lo nws ua nws xwb, tu twg hos xav tia yawg vam lauj twb muab kaws lawm ces tsis ua lawm no lo cia li tso tseg lawm xwb. (Ziag no cov nyob sab nplog teb no tseem ua ob thaj neeb no, tab sis cov nyob sab Meskas 40% tsis ua ob thaj neeb no lawm) qhov ua cov kwv tij nyob nplog teb tseem ua ntawv yog feeb coob tseem pom zoo ua ces sawv daws thiaj tseem ua xwb.
8. Yog tu twg hos xav tia tso tseg no ces cia li tso tseg lawm xwb tsis tau ua neeb ua yiag ab tsis mu kho mu kaws ntxiv lawm, Vim twb kaws tag lawm. Yog sawv daws hos nyiam nkaum toj qaib ua ntej noj peb caug lo kuj ua tau, yog hos muaj tu txiv coj dab txawj lwm qaib noj peb caug ce thaum yuav noj peb caug ntawv lwm qaib noj peb caug lawm xwb, yog hos tsis muaj tu txiv coj dab txawj lwm qaib (lwm sub) es tsis lwm qaib lo yeej tau vim peb tsob hmoob vaj no tsis muaj txoj dab neeg sib ntau sib tua nrog yawm sub thiab puj sub (Tu twg hos lwm sub - lwm qaib lo yeej tsis txhaum - Tsis lwm lo tsi txhaum).
II. Neeb Sub
2.1 Neeb Sau Sub Peb Caug
Thaj neeb sau sub peb caug no tej lau thaum ub lawv yeej ua txhua+ xyoo thiab ua lub hli yuav noj peb caug ntawv ntag, thiab kheev ua rau hnub xiab 25, los yog 27 ob hnub no ua hnub twg los tau xyuas raws lub sij hawm npaj tau.
A. Kev npaj
Ua ntej yuav ua thaj neeb sau sub peb caug yuav tau npaj li hauv qab no:
1. Xyab
ntawv (Ntau Npau ca?)
2. Ob
tug qaib teeb neeb ( yog ob tus txiv neeb ua)
3. Ib
tus lau qaib qua qaws los nplawm sub ( lwm sub)
4. Ib
lub raj xyoob ntev li ib dos los yog tsaj ntawv, nyob ntawm yus cov neeg coob
los tsawg
5. Ib
daim khaub hlab liab, ib txog khaub hlab liab
6. cov txiv tsev nyias npaj cov khaub hlab liab
cov los khi rau nyias cov neeg tsev ib leeg ib daim,yog cov nyob deb lwm lub
zos lawm mas txog thaum ua neeb mam cias li dua rau hau lub raj xwb.
7. Npaj ntswj 3 txog sawv nqeeb.
8. Npaj 6 tus ncej pos ncag, 3tus nqaj pos ncag los txho lwm sub.
B. Kev ua
Kev ua neeb sau sub peb caug ntawm peb pab hmoob vaj ntxhoo (Noob Kooj Neeb) no yog yus cuab hmoob leej twg yog phaj txiv - tus ua tij tsaj plaws los yog tus hlob tsaj plaws ces peb mus ua neeb rau huav tus ntawv tsev, txawm nyob rau lub zos twg, lub teb chaws twg los peb yeej ua koom ua ke tau.
C. Kev teeb neeb
Muab tus txiv neeb ua koos ntsuj cov twj neeb teeb rau tog tag, tus sau sub cov teeb rau tog txua.
D. Txheej txheem ua
- Peb cuab yim neej coob lawm (Kwv tij coob-muaj ntau yim neeg) peb yuav tau siv ob tus txiv neeb ua thiaj tsis sab, thaum ub cov laus tseem tsawg mas lawv kuj siv ib tus txiv neeb thiab ua nkag ib yim zuj zus, tab sis niam no peb coob lawm peb yuav ua pawg thiab zos lawm xwb xyuas seb pawg ntawv los yog lub zos ntawv tus twg yog tus hlob ces mus nkag hauv tus ntawv tsev koos thiab sau sub tag nrho cov twj cuab twj yim nyob rau pawg ntawv los lub zos ntawv xwb thiaj tsis sab rau ob tus txiv neeb.
- Ntawm ob tug txiv neeb, tus ib yog tus koos ntsuj, ua uas ntej muab cov ntsuj neeg koos ua pab ua pawg, muab cov ntsuj zais cia tag. Thaum koos ncig mus txhij mus txhua tag lawm yuav tau rov los muab cov ntsuj neeg tag nrho ua ib teg koos ua ke thiab zais nyab vuj lag vuj siv mam muag txuj muag ci tag, Tos tus sau sub sau tiav mam mus pab nrog tus saus cais sub (Thaum no tus koos ntsuj no ho tig lawv qab)
- Tus ob yog tus sau sub tus no ua lawv qab, tus no yuav tsum tos tus koos ntsuj muab tej ntsuj zais cia tag mas mam mus sau sub thiaj tsis aiv tau cov ntsuj neeg. Thaum sau ncig mus txhij txhua los txog yuav tau muab tag nrho cov sub sau ua ib teg mam tig los cais cov sub.
- Peb pab hmoob vaj ntxhoo (Noob kooj neeb)no muaj 3 caj sub xws li:
1. Caj sub noj sub haus, sub riam sub txuas sub pog yawg,
2. Caj sub dub sub doog ,sub tawg sub ntsa, sub ploj sub tuag, sub laum ntsej sub laum muag, sub tub sub nyuam,
3. Sub muas txwv zeej txwv txoob.
E. Kev cais 3 caj sub
1. Cov sub noj sub haus, sub riam sub txuas, sub pog yawg cov no muab coj mus zwm rau lub raj sub, thaum pib ua neeb lawm peb muab lub raj sub coj los txawb ntawm ib sab thaj neeb tog txuas , muab ib tus pas los txho pav lub raj sub khov kho rau tsis pub kom nchuav, thiab khawb ib lub qhov ncaj Ntawm plawv tag, thaum txiv neeb ua neeb sau mus txog leej twg lub tsev lawm ces tus txiv tsev mus sau cov khaub hlab liab dua khi rau nws cov neeg ntawv tuaj ntsaws rau hauv lub raj, thaum ua mus txhua lawm muab daim ntaub liab npog lub raj sub muab txoj khaub hlab liab pav khov kho rau, txiv neeb muaj xo lo mam nqa lub raj sub ntawv mus txawb rau hauv lub qhov av to txiv neeb muaj xo tswm mam muab faus tswm kom khov kho rau txhob pub tawm
2. Cov sub dub sub doog, sub tawg sub ntsa, sub ploj sub tuag, sub laum ntsej laum muag, sub tub sub nyuam cov no kom tus txiv neeb muab cais mus rau qab taw ntuj taw teb, qab ntuj dub ntuj dag (Thaum cais caj no txiv neeb yuav tau txheev tus qaib pab nplawm).
3. Cov sub muas txwv zeej txwv txoob kom txiv neeb muab cais mus rau muas txwv zeej txwv txoob chaw.
Thaum cais tas li no txiv neeb mam tig loo muab xo rau cov saib neeb muab daim ntaub liab npog lub raj sub thiab muab txoj khaub hlab liab pav khov kho tsis pub plam, txiv neeb mam tso yeej huam khav tooj khav hlau khav rau lub raj sub tag ,txiv neeb mam nquam lub raj sub mus faus rau lub qhov av. Thaum txiv neeb nquam lub raj sub mus rau hauv qhov av lawm tos tus txiv neeb tsa qhua tawm lo tag, txiv neeb muaj xo lo mam muab av npoog rau ces txiv neeb mam dhia los tswm, thaum txiv neeb dhia los tswm tag peb mam kho tswm rau.
Txiv neeb los muab cov pos ncag thiab cov sawv nqeeb nquam mus txhos nram tiaj ua ncej toog ncej hlaus, ua saw tooj saw hlau, txiv neeb txheev tus qaib nplawm cov sub dub sub doog, sub tawg sub ntsa, sub ploj sub tuag kom coj sis mus rau hnub, hnub coj sis mus rau hli, hli coj sis lawm zaj pag zaj qho kom ntsej tsis hnov muag tsis pom.
F. Kev npaj chaw lwm sub thiab lwm sub
1. Hmo ua neeb tag, tag kis kaj ntug pom kev yuav tau muab cov ncej pos coj mus txho, muab 3 tus nqaj khuam rau, muab 3 txog sawv nqeeb khuam rau saum cov hauv ncej thiab cab hauv av los kom tshab rau cov taw ncej.
2. Sawv daw nyias nqa tej riam txuas, phom, tau, hlau coj mus tso rau nram qhov rooj tag lub tsev ua neeb sub ntawv.
3. Thaum peb cov neeg tuaj mus lwm sub peb yuav tau nkag pem lub qho rooj txuas mus hla tej riam txuas nram rooj tag mam mus to lwm sub.
4. Sawv daw mus sawv ua pawg rau sab hnub poob ntawm tus ncej thawj tus sab nrav, tos tus txiv neeb npaj tus qaib tuaj sab pev lwm lawm sawv daw mam ncig kom puv 3 ncig, thaum koj tus cig puv tu ncej 1 peb ncig lawm koj yuav txav los tos ncig tus ncej 2. Thaum cov lawv qab ncig puv lawm ,tus txiv neeb los lwm tus ncej 2 sawv daws mam ncig 3 lwm ib yam; tus ncej 3 los ncig ib yam thiab xwb.
5. Thaum ncig tas li no yuav tau nyob to cov tom qab ncig tag ce sawv daws los koos ua ib pawg, txiv neeb mam muab tus qaib lwm sub cuam tom sab hnub tuaj hla cov neeg mus rau sab hnub poob, txiv neeb muab rab riam neeb kos ncig sawv daws tag mam muab rab txiab neeb los khav ib tus zuj zus tas mam lo nkag qhov rooj tag tawm rooj txua los tsev.
6. Thaum lwm sub tag kom cov hluas muab cov ncej thiab cov sawv nqeeb kwv coj mus pov tseg raus sab hnub poob thiab coj tus qaib lwm sub mus tseev rho cov plaub tis rhais rau cov sawv nqeeb muab tus qaib txoov haus kom siav mam coj los feej los yog laig rau nkauj hnub nraug hli.
Cov lu laig rau nkauj hnub nraug hli hai li nram no:
=> Neb nkauj hnub nraug hli xyoo laus tag kuv vaj ib cuab zeej ntxus cov sub dub sub doog, sub tawg sub ntsha, sub tub sub nyuam, sub ploj sub tuag, sub puas sub ntsoog. Kuv ua tau nqaij tau hno siav feej rau neb tuaj nrog noj nrog yoog neb tuaj nrog yuam cov sub dub ,sub doog ,sub tawg sub ntsha, sub ploj sub tuag, sub puas sub ntsoog mus lawm hnub coog hli kawg kom kuv ib cuab zeej ntsej tsis hnov muag tsis pom nawb.
G. Kev caiv sub
Kev caiv sub ces peb ywj txiv neeb xwb seb txiv neeb kom caiv hnub twg ces caiv hnub ntawv xwb, kev caiv mas tsuas caiv tsis txhob kov riam txuas , taus, phom, hlaus, tsis txhob pub raug kom nqaij tos muaj ntsav tawm xwb, hos hais txog ntawm lub tsev thiab neeg tuaj nrauv tuaj peb tsis caiv yeej tuaj tau thiab peb tawm mus tau.
H. Kev txwv
Peb thaj neeb sub no tej laus ib txwm ua los mam yeej siv tu txiv neeb txiv neej ua xwb, tsis siv tu txiv neeb poj niam (Vim ua nyhav heev tsis zoo siv tu txiv neeb pojniam).
Thaj Neeb Sau Sub Peb Caug Xau Li No.
2.2 Neeb Sub - Neeb Ntawv
Thaj neeb ntawv lub hauv paus ntawm thaj neeb ntawv no mas vim cov vij aiv txwv zeej txwv txoob, txwv zeej txwv txoob thiaj nphau los rau cov twj cuab twj yim (cov xeeb leej xee ntxwv nyob tom qab), yog li no peb thiaj ua thaj neeb no, thaj neeb no ua thaum lub 9 hli ntuj hnub xiab 25 los yog hnub 27, yog 2 hnub muaj hauj lwm tseem ceeb ua tsis tau li no los mus ua rau hnub 29 los yeej tau.
Thaj neeb ntawv no muaj 2 thaj:
1. Thaj thaiv
2. Thaj thib
Qhia Kom Paub, Yawg Vam Lauj piav tias:
1. Thaj thaiv: Thaum ua thaj thib tag ces suav mu rau xyoo tom ntej, Xyoo 1 tsi ua, xyoo 2 tsi ua, xyoo 3 (Xyoo 3 ce rov ua thaj thaiv) thiaj yog,
2. Thaj thib: Ua thaj thaiv tag ces suav mu rau xyoo tom ntej, xyoo 1 tsi ua, xyoo 2 tsi ua, xyoo 3 (Xyoo 3 no mam rov ua thaj thib) thiaj yog,
Txheej tshiab niam no cov lo tuav kev cai dab qhua tsis nug zoo thiab tsi nco zoo thiab lawv coj kev cias loj loj ces lawv cia li muab ob thaj neeb no coj lo ua txhua+ xyoo lawm xwb (Cia li ua thaj thaiv 2 xyoo, ce ua thaj thib xyoo 3, ce rov tig ua 2 thaj thaiv tag ce rov ua thaj thib) sawv daws nyiam ua ces ua lo tau, tab si tiag tiag ua tsis yog lawm.
2.2.1 Thaj thaiv
A. Kev npaj
Ua ntej yuav ua thaj neeb sub - neeb ntawv thaj thaiv yuav tau npaj li hauv qab no:
1. Ob tug txiv neeb uas thiaj tsis sab ( tus 1 yog tus koos ntsuj neeg, tus 2 yog tus sau vij, Yog peb siv ib tus txiv neeb xwb mas nws mus koos ntsuj tag mam los sau vij ces sab dau lawm).
2. Ib tus tshis kub tig 3 ntxees
3. Ib tus npua muaj 5-6 cheej
4. Ob tus lau qaib qua qaws coj los teeb neeb
5. Thaum ub cov lau tsis coob ces ib tus neeg no yuav tsum txaug ob ntsua ntawv. Ib ntsuas siv thaum ncwm npua hos ib ntsuas siv thaum tus tshi, tab si niam no peb kwv tij coob lawm ces yuav txaug li cas los txaug
B. Kev teeb neeb
Muab tus ua ntej los yog tus koos ntsuj cov twj teeb rau tog tag, muab tus lawv qab los yog tus koos cov vij cov twj teeb rau tog txuas.
C. C. Kev ncwm (los yog vas)
Thaum ncwm no ib tus txiv neeb los ncwm xwb los yeej tau, muab tus Npua ncwm ua ntej tas mam muab tus Tshi lo ncwm tom qab, 2 tug tsiaj no puav leej muab hluas vas thiab thaum ncwm tas coj mus tua hauv tsev tas nrho tib sis (Tsi pub coj mu tua nraum zoov).
C. D. Kev ua neeb
1. Tus txiv neeb koos ntsuj muab tus npua koos cov ntsuj neeg thiab muab cov ntsuj neeg zais cias, thaum ub cov pog yawg lawv tseem tsawg ces lawv nkag ib yig zuj zus tab sis niam no peb coob lawm peb yuav nkag ua pab pawg los yog zos lawm xwb seb pawg los yog lub zos ntawv tus twg yog tus hlob ces ua neeb mus nkag hauv tus ntawv tsev mam sau cov twj cuab twj yim uas nyob rau pab pawg los yog lub zos ntawv lawm xwb.
2. Thaum koos thiab muab cov ntsuj neeg zais mus txhij txhuas los txog, muab tus npua los thaiv cov ntsuj neeg tag, mam hlawv ntawv rau tus npua. Ntawm tus npua los kawg li no.!
3. Thaum hlawv ntawv tas rau tus npua lawm, tus txiv neeb ib ua yog tu koos ntsuj no tig ua tus lawv qab mus pab tus sau vij ntaus cov vij, nphau cov vij (kev koos thiab muab cov ntsuj neeg zais no mas vim tus lawv qab yuav tuaj sau cov vij, ntsai tsam sau tau cov ntsuj neeg nrog, yog li no thiaj tsis pub tus sau vij maj sau yuav tsum tos tus koos ntsuj muab cov ntsuj neeg zais kom tas tawm mus rau lwm qhov lawm, tus sau vij mam nkag mus sau), Tus txiv neeb sau cov vij muab tus tshi los koos cov vij, cov vij muaj xws li nram no:
D.3.1. Vij ntaub ploj ntawv tuag,
D.3.2. Vij ua dab swv ua npog,
D.3.3. Vij ua tsov swv ua rog,
D.3.4. Vij tuag riam swv tuag phom,
D.3.5. Vij tuag saum txaj swv tuag saum chaw,
D.3.6. Vij tuag nruab zoov swv tuag nruab tsuag. (Txawj hais ntau tsaj nov los haj yam zoo)
Txwv zeej nphau los poob , txwv txoob npau los txog, ntxov li nyhos yaj ceeb yuav tsis tau yeeb ntug yuav tsis nyog.
Tus koos vij sau vij sau kom tag ib yam nkaus, Ces mam los muab cov vij sau tau ntawv los zoj ua ib teg nog kiag rau tus tshis hauv nruab neeb.
D. E. Kev ntaus cov vij tawm
1. Ntaus cov vij ntawm cov twj cuab twj yim los yog ntawm peb tawm mus raus txwv zeej txwv txoob nrog vaj, Mus sau cov vij nphau los aiv txwv zeej txwv txoob hauv lawv teb chaws kom tag.
2. Ntaus ntawm txwv zeej txwv txoob nrog vaj kom ntab plaw rau txwv zeej txwv txoob sab nrog vaj tim ub.
3. Ntaus ntawm txwv zeej txwv txoob sab nrog vaj tim ub mus kom poob kiag rau taw ntuj taw teb, Ntuj ntsiag to, teb ntsiag txiaj, ces mam li txo pluav cov vij thiab muab cov vij ntawv nphau npog rau sab ntuj nraum ub lawm pug ntuj to thuav teb tho tog, pug qhiv noj teb qhiv noog chaw. Kom ntsej tsis hnov muag tsis pom. Mam li pom sam rau tus tshis kom tus tshis thaiv cov vij (muab tus tshis thaiv cov vij ) kom cov vij txhob npau los rau txwv zeej , txwv txoob. Mam hlawv ntawv rau tus tshis.
4. Tom qab hlawv ntawv rau tus tshis tag lawm ob tus txiv neeb nqi los rau txwv zeeb txwv txoob chaw, mam los txhim kho txwv zeej txwv txoob liaj ia teb chaws rau txwv zeej txwv txoob.
5. Mam tawm hauv txwv zeej txwv txoob los mus rau sab nrog vaj tim no, mam los rub tog ua ib tshooj ntug los thaiv kom cov vij txhob nphau los rau cov twj cuab twj yim, tas no ces nqis neeb lawm xwb.
2.2.2 Thaj thib
Thaj neeb thib ntawv no los yeej ua ib yam li thaj neeb thaiv thiab tab sis tsuas txawv qhov txiv neeb thib hauv nruab neeb thiab cov saum yaj no los yeej thib saum yaj no thiab.
A. Kev npaj
Ua ntej yuav ua thaj neeb sub - neeb ntawv thaj thib yuav tau npaj li hauv qab no:
1. Npaj ib tus laug tshis kom loj thiaj ris taus cov moj zeej, cov ntaj, riam phom, sawv nqeeb,
2. Ntswj ib txog sawv nqeeb kom ntev yuav coj los ua hlua vas
3. Npaj ib tus npua
4. Ntswj moj zeej kom ntau, thaum ub cov lau mas lawv tseem tsawg yus cuab yim neeg muaj pes tsawg tus txiv neej mas yeej ntswj kom tau npaum ntawv tus ntag. Peb ntswj cov moj zeej ntawv ,ntswj kom tau cov me me xwb tus tshis thiaj thauj tau thiab thiaj tau ntau tus tab sis peb yuav tau ntswj 3 tus kom loj dua cov, ua cov thawj. Txua ntaj , txua riam , txua pom thiab tej dav hlau los yog tej cuab yeej ua rog,
5. Npaj 9 lub rooj. 2 lub loj rau 2 tustxiv neeb ua neeb. 7 lub rooj me muab teeb sib tshooj rau
6. Npaj ib lub hnab ntim ib lub lauj kaub, ib qho txhuv, ib rab phom.
B. B. Kev teeb neeb
Muab tus ua ntej los yog tus koos ntsuj cov twj teeb rau tog tag, muab tus lawv qab los yog tus koos cov vij cov twj teeb rau tog txuas (Ua ib yam thaj thaiv)
C. C. Kev ncwm (los yog vas)
Thaum ncwm no ib tus txiv neeb los ncwm xwb los yeej tau:
- Muab tus Npua los ua tus koos ntsuj neeg, thaum ncwm tus npua tas coj tus npua mus tua tseev,
- Muab tus Tshi coj los koos vij, thaum vas tus tshi no mas muab txoj sawv nqeeb los vas cov neeg, (tsis txhob muab hlua vas) Thaum vas tas hlawv ntawv rau tus Tshis kom tus Tshis los nrog ris cov vij ces cab tus tshis tawm txhob maj muab tus tshis tua.
C. D. Kev teeb tu Npua
Thaum tseev tau tus npua
los npaj ua neeb muab tus npua teeb rau tog tag nram qab ntawm tus txiv neeb
koos ntsuj, Ho tus Tshi tsis teeb.
D. E. Kev ua neeb
1. Kev ua neeb yeej ua ib lub hws ib yam li thaj thaiv thiab xwb. Tus koos ntsuj muab tus npua ua koos ntsuj ua ntej nkag mus kom txhij txhua ces mam hlawv ntawv rau tus npua tag, mam tig los nrog tus sau vij ua cov vij thaum no tus koos ntsuj ho lawv qab.
2. Tus koos vij sau vij yeej sau vij lawv tus koos ntsuj qab, tab sis kom nco ntsoov tos tus koos ntsuj tawm hauv lub tsev los yog pab pawg yim neeg ntawv tawm lawm mas mam nkag mus sau cov vij hauv thiaj sau tsis tau cov ntsuj neeg.
3. Thaum sau cov vij mus txhij txhua lawm, Thaum no ob tus txiv neeb los txheev lub hnab, lub lauj kaub, rab phom thiab txhuv ntim rau lub hnab muab rau tus txiv neeb sau vij ev,
4. Muab cov moj zeej, riam phom teeb rau nram qhov rooj tag tig mus rau sab nraum zoov, npaj 5-6 leej hluas npaj tuav cov riam phom, ntaj yuav npaj khob thaum tus txiv neeb ntaus cov vij.
=> Ob tug txiv neeb ntau kom cov vij mus poob rau txwv zeej txw txoob teb. Thaum txiv neeb ntau hauv nruab yeeb cov hluas 5-6 leej ntawv muab cov riam ntaj sib khob thiab yom mus lawm nraum zoov, cov tuaj phom kuj tua tig mus nraum zoov ib yam thiab hais tias "sawv daws tuas tiag tiag kom poob mus rau txwv zeej txwv txoob nrog vaj nawb", Thaum txiv neeb tsum ces sawv daws kuj tsum ib yam,
=> Ob tug txiv neeb tua lwm ob kom tawm hauv txwv zeej txwv txoob nrog vaj mus rau sab nrog vaj tim ub. Cov hluas saum yaj no los yeej pab tua ib yam nkaus thiab,
=> Ntau lwm peb ntawm txwv zeej nrog vaj tim ub mus kom poob rau sab ntuj nraum ub ntuj tho thuav teb tho tog, ntuj ntsiag txiaj teb ntsiag to, qhiv noj teb qhiv noog chaw, Cov hluas saum no los yeej tua ib yam nkaus thiab.
5. Thaum npau cov vij no tas ces cab tus tshis los rau nram qhov rooj tag sab nraum zoov, Mam muab txoj sawv nqeeb los zoj cov moj zeej , riam phom ntawv rau tus tshis ev yog ntau lawm mam muab ib nrab rau cov neeg nqa los yeej tau, cab tus tshis mus rau sab hnub poob mam muab tus tshis tuas, txiav lub taub hau, muab ib tus pas chob lub taub haus coj mus txho rau qab zeb los qab ntoo, tig lub taub haus mus rau sab hnub poob, muab cov moj zeej, riam, phom tso rau tom qab lub taub hau tshis, tig ntsi ntaj ,ntsi phom thiab cov moj zeej tig xub ntiag mus rau sab hnub poob.
=> Ob tus txiv neeb muab cov vij ntawv nphau lawm qab taw ntuj taw teb tag ces muab tus tshis los thaiv kiag rau, mam hlawv ntawv rau tus tshis.
=> Mam muab cov mlom tooj mlom hlau ( cov moj zeej) thaiv tom qab ntawm tus tshis, Mam li txo lub hnab thiab lub lauj kaub ntawv.
=> Ob tug txiv neeb nqi los mus rau hauv txwv zeej txwv txoob los txhim kho txwv zeej txwv txoob liaj ias teb chaws rau txwv zeej txwv txoob tag.
=> Tom qab thaum txhim kho txwv zeej txwv txoob liaj ias tag mas ob tus txiv neeb los tuam los yog nphau cov rooj los thaiv tsis pub kom cov vij nphau los aiv cov twj cuab twj yim los yog saum yaj ceeb no, kev tuam muab cov rooj me ib lub zuj zus los teeb rau ntawm tus tuaj cov vij pob tw, Tuam cov me ib lub zuj zus tag ce tuam 2 lub loj ib lub zuj zus thiab, Mam muab ib lub rooj tshiab coj los teeb rau ob tug txiv neeb ua mus ntxiv kom nqis.
F. Kev txwv ntawm tu Tshis
- - Tus Tshis tsis pub coj los noj tom tsev, thaum txog caij noj ce hais tej poj niam me nyuam tuaj noj ntawm qhov chaws tseev ntawv xwb.
- Tsis pub nqa cov nqaij los tsev, tsis hais me nyuam, los yog cov laus, Txawm noj tsis tas los tag kis mam mu noj los tau (lo yog cia li pov tseg lawm xwb).
Kev F Thaj Neeb Ntawv Xau Li No.
Comments
Post a Comment